Ønskjer uavhengig muslimsk samtalepartnar

Oslo universitetssjukehus har fått middel frå Barne- og familiedepartementet for å tilsette ein muslimsk samtalepartnar. Vedkomande skal ha samtaler og kunne tilby religiøse ritual for pasienten og for pårørande. Søknadsfristen gjekk ut denne veka.

Eit krav var at søkaren må vere medlem i eit muslimsk trussamfunn — som kan føre tilsyn med arbeidet vedkomande utfører. I eit innlegg i Aftenposten kritiserer mellom anna spaltist i Vårt Land og høgskulelektor Amina Selimovic frå Høgskulen i Innlandet, dette tilleggskravet.

– Det er særs positivt med opprettinga av ei slik stilling, men vi er mange som ikkje skjøner kva dei har tenkt i forhold til dette kravet. Søkaren burde heller bli vurdert ut frå den kunnskapen og dugleiken søkaren sit med – ikkje ut frå om han eller ho er medlem i eit etablert trussamfunn, seier ho.