Innvandringsminister haustar massiv kjeft for ramadankritikk

Innvandringsminister Inger Støjberg, frå partiet Venstre, har hissa på seg muslimar, partikollegaer og fagrørsla med utspelet om at fasten under ramadan er samfunnsfarleg. På eiga Facebook-side skriv Støjberg at bussjåførar som korkje har fått mat eller drikke i løpet av ti timar eller meir kan utgjere ein tryggleiksrisiko:

«Det kan helt lavpraktisk være farligt for os alle, hvis buschaufføren hverken spiser eller drikker i løbet af en hel dag, ligesom man selvsagt ikke yder og præsterer nær det samme på fabrikken eller på sygehuset, hvis man gennem en hel måned ikke spiser og drikker i alle døgnets lyse timer», skriv ho.

LES OGSÅ: Vil forby barn å faste

Ramadan er den muslimske kalenderens niande månad og islams fastemånad. I år starta ramadan ved solnedgang 15. mai, og blir avslutta 14. juni.

LES MEIR: Burka-nekt i Danmark

Ulukker

Utspelet Støjberg serverte måndag har utfordra mange, og statsråden har fått svar på tiltale:

– Eg er usamd i synspunktet. Eg har ikkje registrert noko problem, seier folketingsrepresentanten Jan E. Jørgensen, partikollega i Venstre. Han meiner spørsmålet må handsamast på arbeidsplassane, ikkje av politikarar.

Transportselskapet Arriva tek kraftig avstand frå utspelet og melder at fastande sjåførar ikkje er involvert i ulukker.

Same bodskap kjem frå fagforbundet 3F. Støjberg prøver å skape eit problem som ikkje eksisterer, meiner leiar Jan Villadsen.

– Dette er ein trist måte å starte ramadan på, seier Özlem Cekic frå Socialistisk Folkeparti.

Kaloriar

Andreas Gylling Æbelø, direktør i Aids Fondet og samfunnsdebattant har ei bøn: – Lat oss få fastetid frå tome politiske kaloriar, Inger Støjberg.

Han meiner statsråden siste utspel sikra henne akkurat det ho ønskte. Dei som er opprørte blir berre meir opprørte, og tilhengjarane tilsvarande nøgde.

LES MEIR: Danmarks første kyrkje gjenreist

Gransking

Men opposisjonspartiet Socialdemokratiet går eit steg vidare. Dei ber fleire statsrådar undersøkje om fastande muslimar faktisk er årsak til trafikkulukker og sjukehustabber i Danmark.

Innvandringspolitisk talsmann Mattias Tesfaye seier til Politiken at «enten har sjukehus og busstransporten eit tryggleiksproblem, eller så har dei det ikkje». Transportministeren må no utgreie om det er fleire trafikkuhell under ramadan, og helseministeren må sjekke om det er fleire feiloperasjonar på sjukehusa under fastemånaden.