«En gang for alle skal vi finne ut hvem som er Skandinavias mest djevelske folkeslag», lovar arrangøren. Til å representere nabolanda har dei fått tre teologar. Likskapen stoppar der. Den svenske venstreradikalaren, feministen og anarkisten, Tobias Elof Hadin, er venta å dukke opp på Bergen stasjon, medan den danske soknepresten, Marie Høgh, truleg går inn for landing på Flesland med konservativ høgresidepolitikk i bagasjen. Vår eigen Bjørn Eidsvåg byr nok på folkeleg og liberal teologi.
Skilnad
Tidlegare kultur- og debattredaktør, Hilde Sandvik, skal leie samtalen og satsar på å få fram kva som rører seg på både overflate og djupne.
– Det eg håpar å få belyst denne kvelden, er ikkje berre karikaturen, men også å gå ned i kva skilnadane handlar om, og kvifor dei finst, seier Sandvik.
– Har du nokre hypotesar om kva som skil teologien mellom landa på førehand?
– Danskane har lang tradisjon for teologiske diktarar og politikarar – frå Søren Kierkegaard til Sørine Gotfredsen. I ein annan debatt eg var med på, blei det hevda at lang teologisk tradisjon er ein av årsakene til at dei har eit mykje tøffare debattklima i Danmark. Sverige har verdas mest sekulære folk, og truleg gjeld det teologane òg. Dei er særs opne mot andre religionar og har den kortaste utdanninga, berre fem år. Norge er nok det mest truande landet av dei tre, noko som truleg har leia til ei sterk humanistisk rørsle som vi ikkje ser i dei andre landa.
LES MEIR: Studentprest kunne tenkt seg et kristent kapell
Politisk Gud
Sandvik gler seg og seier ho trur det blir ein morosam samtale.
– Vi skal innom mykje, mellom anna det store spørsmålet: Høyrer Gud heime på venstre- eller høgresida i politikken?
Arrangementet er det åttande i «Norsken, svensken og dansken»-serien, eit samarbeid mellom Broen.xyz og Litteraturhuset Bergen. Samtalen bli også kringkasta på Debatt i P2.
Kven er mest rettruande, norsken, dansken eller svensken?
