– Vårt Land er eit univers, ikkje berre ei avis
PODKAST: – Det er utruleg verdifullt at nokon ber fram ei historie med stemma si, seier podkastansvarleg i Vårt Land, Ruth Einervoll Nilsen. Ho vil gjere Vårt Land relevant for endå fleire – og yngre.
PODKASTSJEF: – Lydformatet og samtaleformatet gir noko anna enn det ein tekst kan gjere. Folk får lov til å snakke i lengre tankerekker, seier podkastansvarleg i Vårt Land, Ruth Einervoll Nilsen.
Erlend Berge
– Vi må begynne å tenke at Vårt Land og andre mediehus i dag er eit univers, ikkje berre ei avis. Podkast er ein del av det, seier Ruth Einervoll Nilsen, podkastansvarleg i Vårt Land.
I ein liten serie artiklar har Vårt Land tatt for seg den nye mediekvardagen der podkasten er blitt ei viktig plattform. Tidlegere har vi intervjua Ole Asbjørn Ness, som driv den høgreorienterte podkasten Ness, og Mímir Kristjánsson og Magnus Marsdal, som driv den venstrevridde podkasten Mímir&Marsdal.
For Nilsen handlar Vårt Lands eigne podkastar om å foredle prosjektet og journalistikken på ei plattform som Vårt Lands lesarar ikkje nødvendigvis er på.
