Ida Lindtveit (23) er leiar av Kristelig Folkepartis Ungdom (KrFU). Ho har Bibelselskapets 1978-omsetjing.
Kven fekk du Bibelen av? Når?
– Av foreldra mine, til konfirmasjonen.
Korleis ser han ut?
– Burgunder-raud. Skinn. Inni er det streka ut dei viktigaste bibelversa. Med ein litt dårleg penn.
Teksten fortsetter under bildet
Når les du i han?
– Eg brukar den relativt sjeldan, men det hender ein gong i mellom. Eg er ein sporadisk bibellesar.
Korleis les du han – tek du det som står der bokstaveleg?
– Det kjem litt an på kvar eg les i Bibelen. Men ja, det er klart eg tek mykje bokstaveleg, spesielt i det nye testamentet. Det er nok der eg brukar mest tid. Men ein må sjølvsagt alltid tolke det ein les, sidan det er skrive i ei anna tid. Eg er oppteken av kva det som står der kan bety for meg i dag.
Kvar har du han liggande?
– I bokhylla i stova.
LES OGSÅ: Ateisten Tom Egeland har fleire biblar rett ved skrivepulten
– Det varierer veldig. Eg skriv ikkje så mykje i den lenger. Men eg var mykje på leir tidlegare, og då brukte eg bibelleseguiden aktivt. Den hjelper deg å finne bibelvers dersom du er lei deg, eller glad. Den guidar deg inn til viktige vers.
Er det dei same versa som er viktige for deg i dag?
– Dei seier noko om kva eg var på den tida, kva tankar eg hadde. Så dei betyr ekstra mykje for meg.
Har du lese han frå perm til perm?
– Nei, det har eg aldri gjort. Eg har starta nokre gongar og har veldig lyst til å kome gjennom heile.
Kva betyr denne Bibelen for deg?
– Veldig mykje. Ser på den som ein slags tryggleik.
Kva er ditt favorittbibelvers?
– Eg har to. Det eine er Bergpreika. Den er veldig viktig for meg. Den er både ein tryggleik, og inspirasjon og styrke i kvardagen. Det andre er «Størst av alt er kjærligheten».