Striden om opningstidene på Vinmonopolet har rast sidan januar. Då annonserte Solberg-regjeringa at forbodet mot å halde Vinmonopolet ope på jul-, nyttårs-, påske- og pinseeftan, pluss valdagar, skal skrotast. Folket skal få handle vin og sprit heilt fram til høgtidsfreden senkar seg.
Men det er ikkje stortingspolitikarane som til slutt avgjer om Vinmonopolet skal halde ope på den mest omstridde dagen, 24. desember.
Siste ord i denne saka har leiinga i det statlege alkoholselskapet. Leiar i helsekomiteen, Kari Kjønnaas Kjos (Frp), seier til Vårt Land at Stortinget ikkje påbyr Vinmonopolet å halde ope alle desse dagane. Lova blir endra slik at det blir mogeleg for polet å ha opne butikkar.
– Betyr dette at det er leiinga i Vinmonopolet som avgjer om det blir opne pol på juleftan, Kjønnaas Kjos?
– Ja, det betyr det.
LES MER: Ap og SV snur ber Høie stoppe julepol
'Kommersielle hensyn'. Dette betyr at det kan bli langt fram til opne pol på alle høgtidsdagar. For administrerande direktør Kai G. Henriksen og styreleiar Hill-Marta Solberg er ikkje tilhengjarar av opne butikkane på juleftan:
«Åpne vinmonopolbutikker juleftan er neppe noe utbredt ønske fra folk flest. Kommersielle hensyn taler også for at Vinmonopolet holdes stengt juleftan», melder administrerande direktør Kai G. Henriksen i høyringsbrevet til Helsedepartementet. Synspunkta blei formulert etter at styret hadde handsama liberaliseringsforslaget til regjeringa.
Dagens styreleiar i det statlege alkoholselskapet er Ap-veteranen Solberg. Fram til 2009 var ho nestleiar i partiet. Sjølv om Ap seier ja til høgtidsopne pol i partiprogrammet, har partiet i vår snudd og vil no frede julekvelden.
LES MER: Fritt fram for julepol
Må ha mange kundar. Både Solberg og Henriksen var i går opptatt med styremøte i Vinmonopolet og hadde ikkje høve til å kommentere opningstidsaka. Men kommunikasjonsdirektør Halvor Bing Lorentzen stadfester at det blir opp til Vinmonopolet å finne fram til nye opnings- tider.
– Blir det rom for å halde ope på juleftan vil nok ikkje alle våre butikkar vere opne. Vi må også ta kommersielle omsyn.
– Kva betyr det?
– Butikkar med godt kundegrunnlag vil vere opne, men det vil ikkje gjelde alle, seier Halvor Bing Lorentzen.
LES OGSÅ: KrF snur om jule-pol
Konsekvensen blir at mange nordmenn vil møte julestengde pol den 24. desember. Bare store, lønnsame butikkar i byar og store tettstader vil halde ope. Resten blir lukka. For når polleiinga snakkar om «kommersielle hensyn», snakkar dei mellom anna om lønnskostnader. I dag har alle poltilsette fri på høgtidsdagane. Arbeidstakarorganisasjonane har sagt at dei er villige til å arbeide, men då må lønna «spritast» monaleg opp.
LES OGSÅ: Protesterer helt til Høie snur om jule-pol
Administrerande direktør Henriksen og styreleiar Solberg seier det slik: «Vinmonopolet fastsetter åpningsdager og åpningstider for landets vinmonopolbutikker ut fra om forventet salgsinntekt står i forhold til driftskostnadene ved å ha butikken åpen», i høyringsbrevet.
LES OGSÅ: Sp vil presse bort Høies jule-pol
LES OGSÅ: Ber Høie droppe åpent jule-pol