Kvifor skal Hanvold seie unnskyld?

(Dette innlegget kan lesast som ein oppfølgar til «Pengefrøets hjelpere», og ei ny helsing til Visjon Norges sendepartnarar.)

Litt bakgrunn: 27. februar kommanderte altså Visjon Norges velkjende gjest folk til å gi kanalen pengar. For å få vern frå Himmelen mot viruset som herjar i verda.

Noko av det viktigaste for Jan og Inger Hanvolds verksemd er "lova om å så og hauste". Ein essensiell ingrediens i denne lova er "du kan så spesifikt": Du kan så pengar for å bli frisk, eller for frelse for familien. Om du treng eit hus, kan du gi pengar til ein person eller ei teneste/verksemd (gjerne noko(n) som har med hus å gjere eller som har suksess) – og kalle pengane "eit såkorn for hus". Plante eit (hus)pengefrø, altså. Du kan forresten plante pengar for ei kone også, ifølge Hanvolds bodskap i Bergen i 2014. Eg har ikkje prøvd akkurat det, men det høyrest spenstig ut.

I tillegg til å byggast på, blir denne "ingrediensen" repetert i Hanvolds historieforteljing. For eksempel i Studio Direkte 8. mars, då Jan Hanvold sa dette om korleis dei – ja, nettopp – har bygd kanalen på sin eigen "så spesifikt"-praksis:

"Vi har jo – jeg har jo prekt dette her i ikke – mer enn 17 år. I mine to bøker "Gud og MAMMON" og "Himmelsk økonomi" så underviser jeg sterkt og tydelig om dette. Og alt det vi holder på med, det er jo, det er jo en frukt av det. Før vi begynte TV-kanalen, Inger, så drev vi og sådde spesifikt
[...] Jeg husker jeg sådde til Tore Haugerud, som drev Haugen Hotell, og jeg skrev: "P.S. Dette er et såkorn for TV-konsesjon og studio i Oslo." Og da, da fikk vi det. Det var helt overnaturlig.
[...] vi kunne aldri ha starta Visjon Norge, vi kunne aldri ha drevet Visjon Norge i 17 år, uten at vi hadde praktisert, personlig og med Visjon Norge, loven om å så og høste. Det hadde vært helt umulig – men dette er bibelske prinsipper, da, som da, da, da, når du studerer Skriftene, for det er dét det er snakk om. Dette er jo da levende teologi hvor vi praktiserer det vi preker om [...] Og alt det vi har, det er jo noe som vi har sådd da spesifikt for."

Kvifor skal Visjon Norge-sjefen beklage eit av hovudelementa han har bygd kanalen på – og trudd og tilrådd i fleire tiår? Kvifor trur nokre av leiarane i kristen-Noreg at dei kan få Hanvold til å snu opp ned på det han trur på?

Og korleis kan ein så stolt mann be om orsaking?

Framsida på Hanvolds bok Himmelsk økonomi (2006 Vision Heaven Ltd.)

Men vent litt, Sigmund! Hanvold kan beklage! Tysdag 17. mars beklaga han jo fleiping med handhygiene, smitte og Den heilage ande!

Å? La oss sjå på litt av den "orsakinga" frå Hanvold (JKH) og Hans Jacob Bekken (HJB):

· JKH: "[...] det var en galgenhumorspøk, og selvfølgelig: Jeg beklager det, men bakgrunnen for det ... det er jo ... 
[...] så er det klart at jeg ber, men jeg bruker også, også, jeg har jo dynamitt, ikke sant? Så jeg har jo denne sprayen her, så jeg tar litt nitroglyserin. Og så går det liksom igjen, med bønn og nitroglyserin [spruter i munnen]. 
[...] Så jeg bare beklager det, altså, det var en spøk, dette her med Haddal i går. Og jeg tror det er bare dette at avisene ikke har noe å skrive om. 
[...] Men som jeg sier: Jeg beklager så mye. Vi skulle overhodet ikke tatt den spøken. Det ser jeg jo i ettertid. Men som jeg sier: Vi følger helsevesenets prosedyrer her på Visjon Norge, vi har flere folk i karantene. [...]
Og som vi sier: Vi holder én meters avstand her nå, Hans Jacob. [...]"

· HJB: "Ja, virkelig, altså, men jeg tror at vi likevel skal være frimodige, altså som en kristen evangelisk TV-kanal, og si at det fins en frihet ifra frykt her. Så vi, vi, det er ikke noe galt i det, mener jeg, altså. Det tror jeg ikke. Men det kommer folk som ønsker å så inn her, Jan."

· JKH: "[...] det er klart: uten Jesus i hjertet mitt, så hadde jo jeg vært engstelig. Det er jo bare sånn [...] og så må vi ikke glemme å ha litt selvironi og ha det litt gøy samtidig. He he. Men jeg beklager den galgenhumoren." [Klappar hendene saman, gliser.]

· HJB: "Ja, hvis det var støtende – hvis det var støtende."

· JKH: "Ja."

· HJB: "Det er så. Men vi får bare fortsette å gjøre det vi skal her på Callsenteret." 

Sitat slutt (mi utheving). Video i kommentarfeltet her.

TV-kanalen gir likevel, på Facebook-sida si, inntrykk av at Hanvold er lei seg. Hanvold sjølv har ikkje skrive noko sånt, eller klart å beklage utan å fjase og trekke orsakinga tilbake. Hanvolds ja til Hans Jacob Bekkens atterhald "hvis det var støtende" er eit viskelêr over den halvkvedne orsakinga. Det er òg ei øydelegging av den meir reelle orsakinga han gav overfor Dagbladet.

Jan Hanvold – og Rodney Howard-Browne, Paula White-Cain, Dionny Baez og andre "salva" heltar han har – herjar. Dei herjar ved å seie dei mest absurde ting om helsespørsmål. Nokre fleipar, nokre er dønn seriøse. Dette kjem i tillegg til framgangsteologi og pengepress dei har plaga folk med i årevis. Dette er farleg tankegods, og under ein pandemi blir det ekstra farleg. Hanvolds såkornheltar kjem ikkje til å angre, og dei kjem ikkje til å bli ufarlege. Hanvold syg framleis inspirasjon frå dei. Han bryr seg meir om kva dei seier enn kva Normisjon og Norsk Luthersk Misjonssamband seier – anten det gjeld teologi, helse eller å seie unnskyld utan reservasjon.

Er ikkje no begeret snart fullt for kristne frå Normisjon og NLM som i ei årrekke har gitt Hanvold program å sende?

Er det best for kristen-Noreg å stikke fingeren i jorda – og innsjå at sjølvutnemnde apostlar ikkje endrar seg?