Datatilsynet undersøkjer ei sak der Jehovas vitne kan ha brote personopplysningslova, melder Fædrelandsvennen.
Bakgrunnen er ei klage til Datatilsynet frå ein medlem i Jehovas vitne som meiner trussamfunnet har lagra personopplysningar om han som kom fram i eit såkalla domsutval. Utvalet behandla det at tidlegare ektefelle hadde gifta seg med ein annan utan å vere «bibelsk skilt». Dette domsutvalet skal ha teke notat om både kvinna og sexlivet til mannen.
Mannen har bede om innsyn i kva som blir oppbevart av opplysningar om han, noko Jehovas vitne har nekta han. Datatilsynet har gitt trussamfunnet frist til 7. oktober med å svare på spørsmåla, og ønskjer ikkje å kommentere alvorsgrada i saka før dei har fått svar frå Jehovas vitne.
Jehovas vitnes talsperson, Jørgen Pedersen, har ikkje svart på spørsmål knytt til saka, men skriv i ein e-post at trussamfunnet med glede «svarer på de spørsmål Datatilsynet måtte ha om vår behandling av personopplysninger».
Han legg til at praksisen til trussamfunnet rundt personopplysningar er «helt i samsvar med personvernlovgivningen.»