Kallar inn Mehl om såra ukrainske soldater

Det er pinleg at Støre-regjeringa ikkje har klart å følgje opp betre, meiner Høgres justispolitiske talsmann Sveinung Stensland.

Vårt Land fortalde for to veker sidan at Støre-regjeringa ved justisminister Mehl har fått fire førespurnadar frå Ukraina:

«Norge mottok 23. april, 5., 7. og 10. mai bistandsanmodninger gjennom EUs ordning for sivil beredskap om å tilby medisinsk evakuering av skadede ukrainske soldater», opplyste justisministeren i eit skriftleg svar til Stortinget.

Venstre-leiar Guri Melby, som tok evakuering av skadde ukrainske soldater opp med Mehl i eit skriftleg spørsmål, ba Mehl handle, og det raskt:

«Det ukrainske helsevesenet er svært presset nå, mens norsk helsepersonell er i stand til å gi svært god medisinsk oppfølging til en gruppe skadde ukrainske soldater. Det er flott at justisministeren bekrefter at regjeringen nå vurdere dette, men jeg håper det snart foreligger et konkret svar. Ukrainske myndigheter har bedt Norge ta i mot skadde soldater hele fire ganger på svært kort tid, og da mener jeg vi bør stille opp», melde Melby i ein sms til Vårt Land.

Høgre: Pinleg

No reagerer Høgre på at regjeringa og Mehl framleis ikkje har svart.

Partiet meiner det hastar å få informasjon. Høgre har difor bedt om at Mehl må møte i Stortinget allereie tysdag for å gjere greie for status, melder NRK.

I Stortingets forretningsorden er det rom for hasteinnkallingar. Presidentskapet skal no ta stilling til Høyres krav.

Det vil no bli sendt eit brev frå Stortinget der Mehl blir beden om å kome til Stortinget når tysdagens møte sluttar – truleg i 20-tida.

Høgres justispolitiske talsmann Sveinung Stensland karakteriserer tidsbruken til regjeringa som pinleg:

– Norge skal vere eit land å reikne med. Skadde ukrainske soldatar treng vår hjelp, og eg kan ikkje fatte kvifor regjeringa ikkje jobbar hardare og raskare med å svare på førespurnadane om bistand, seier han til NRK.

Dagbladet skriv tysdag at Norge arbeider med ei løysing der ein ikkje tek såra soldatar direkte frå fronten i Ukraina, men at dei kjem til Norge via eit tredjeland, som kan vere Polen.

Polen behandlar soldatar

Polens statsminister Mateusz Morawiecki opplyste i april, til fleire medium, at landet tek imot såra ukrainske soldatar.

Euractiv skriv at 120 helseinstitusjonar har gjort klar 7.000 sjukehussenger for soldatar frå nabolandet, og at eit spesialtog vil frakte såra soldatar frå Ukraina til Polen.

Reuters melder at statsminister Morawiecki har sagt at Polen kan ta så mange som 10.000 skadde soldatar.

[ Ber Norge evakuere såra ukrainske soldatar ]

Hentar pasientar

Ei eventuelle evakuering av såra ukrainske soldatar kan skje med det norske ambulanseflyet som inngår i EUs ordning for sivil beredskap, Union Civil Protection Mechanism (UCPM).

I 2020 signerte Norge ein eigen avtale med EU om å etablere og drifte eit ambulansefly for pasientar med alvorlege smittsame sjukdomar. Tenesta er organisert gjennom UCPM.

Flyet, med norsk mannskap, blei operativt på vegner av EU 1. mars i år. Første oppdrag var å evakuere ukrainske pasientar frå Polen til Norge.

Støre-regjeringa har sagt ja til å hente inntil 550 ukrainske pasientar med pårørande, som er blitt evakuerte til Moldova.

Norge skal vere eit land å reikne med

—  Sveinung Stensland, Høgres justispolitiske talsmann

Døde soldatar

Sidan Russland gjekk til åtak på nabolandet Ukraina 24. februar, har president Volodymyr Zelenskyj evna å mobilisere store ukrainske styrkar, som står opp mot den russiske invasjonshæren.

Men krigen kostar Ukraina dyrt.

Nasjonalgarden har mista 560 soldatar sidan 24. februar, og nesten 1.700 soldatar er såra, opplyser sjefen for den militære styrken, Oleksiy Nadtochy. Det er nyhendebyrået AFP som siterer Nadtochy.

Sidan krigen starta for snart tre månader sidan har begge sider, Ukraina og Russland, vore varsame med å gje opp tal på døde og såra soldatar.

Minst 10.000 såra

AFP skriv at midt i april opplyste president Zelenskyj at mellom 2.500 og 3.000 ukrainske soldatar var døde, og at kring 10.000 var såra, og at det var vanskeleg seie noko om kor mange av desse som ville overleve.

I det utbomba Azovstal-stålverket i Mariupol er det mange såra ukrainske soldatar. Tyrkia har tilbode seg å evakuere dei sjøvegen.

---

Ukraina-krigen

• 24. februar invaderte Russland Ukraina
• Ingen ukrainske menn mellom 18 og 60 år får reise frå landet, dei blir innrullerte i forsvaret og må kjempe mot russiske styrkar.

---

Fly frå Moldova

Regjeringa sa tidlegare i vår at Norge vil hente 2.500 ukrainske flyktningar som oppheld seg i Moldova. Desse kjem i tillegg til dei 550 pasientane.

21. mai landa det første flyktningflyet frå Moldova i Norge. Berre 14 ukrainarar kom med flyet.