Oppdaga gleda i Forkynnaren
RELIGIØS KLASSIKAR: Avtroppande forstandar i Det mosaiske trossamfunn, Ervin Kohn, fekk brått eit nytt blikk på ei av Bibelens klassiske bøker.
BIBELSK TEKST: Avtroppande forstandar Ervin Kohn i Det mosaiske trossamfunn har dei seinaste åra lese Forkynnaren på ein ny måte.
Matilde Solsvik
Ervin Kohn har dei seinaste tretten åra vore forstandar i Det mosaiske trossamfunn i Noreg. No gir han seg for ikkje å bli skulda for nepotisme – favorisering av slektningar – når sonen Michael byrjar som rabbinar i august.
– Det er klart det er vemodig å gi seg, men kva er det Forkynnaren seier: Alt har si tid, seier Kohn.
Det er nettopp Forkynnaren den avtroppande forstandaren trekker fram når han får spørsmålet om å anbefale ein religiøs klassikar. Mange jødiske og kristne bibellesarar tenker nok på Forkynnaren som ei bok full av mismot, med si vekt på det fåfengde: «Fåfengt, seier Forkynnaren, fåfengt og forgjengeleg – alt er fåfengt!»
