Vampyrdikt med mykje lengt

Anders Brenno debuterer med diktsamlinga Vampire Yeah, der han knyter seg til den ­«gotiske» grøssar-lina i romantikken. Dette har vore gjort med stort hell av moderne diktarar før, og då tenkjer eg særleg på den islandske Nordisk Råd- prisvinnaren Gyrðir Elíassons diktsamlingar frå 1980-talet.

Sorg og saknad

I denne ­debutsamlinga virkar det som om poeten gjer seg bruk av klisjéar frå kitch og grøssar-tradisjonen for å uttrykka noko som svært mange unge debutantar har gjort før han: Kjærleikssorg, saknad og lengt. Det er haust på veg mot vinter og det er myrkt og det er mykje regn.

LES OGSÅ: Evig liv er blodig alvor

Ureint

Han skriv medvite eit ureint språk, eit slags bokmål iblanda dialektord og svært mykje engelsk. Det er eit visst «trøkk» i dette språklege sammensuriet som samsvarar med den desperasjonen som ungdomeleg kjærleikssorg gjerne fører­ til. I det kan nok mange av oss høyra ekko frå eigne ungdomsår, og ei identifisering – som er føresetnaden for at litteratur skal opplevast som noko som vedkjem lesaren. Det må vera minst eitt gjenkjenningsplan i eit diktverk der lesaren lokkast til å gå med på forfattarens fiksjon.

Klisjéar

Det er ikkje så mykje meir enn dét i denne diktsamlinga, gjenkjenning av ungdoms desperate oppleving av at alt bryt saman når ho eller han – i samlinga kalla «baby» – går frå deg. Derimot er det svært mykje, ja ei overlessing av klisjéar, og dessutan nokså vonlause utbrot som til dømes «Trur jeg må ty til spiritisme ­eller no» og groteskeri som utilsikta (?) vippar over i karikatur som til dømes at eg-et i samlinga «slurper sjela di/ gjennom sugerør i aua».

LES OGSÅ: Zombier skal lære elever rett og galt

Engelsk

Det må vera i ­orden å blanda inn ulike språk i diktet, også dét har vore gjort før. Men alt i diktet bør ha ei retning, og kanskje er også dei engelske klisjéane ein del av uttrykket for eit oppløyst eg hjå debutanten:

…

Du er gothbaby masterpiece

Du er vampire lovedoll

Du er werewolf omega

og vintage french moviestar

Og jeg er en fugitive in the night.

…

Ein stad må ein poet byrja. Om Vampire Yeah innleier noko som kan veksa til vesentleg poesi kan ein iallfall vona.