Prisen for å ikkje kunne sleppe taket
Frøa Kamala Harris sådde under debatten kan komme til å vekse rundt Donald Trump gjennom heile hausten
IRRITERT: På eit folkemøte i byen Flint i Michigan var det svært tydeleg at Donald Trump framleis er irritert på Kamala Harris sine angrep i debatten veka før.
Erlend Berge
Før debatten spurte eg om det var mogleg å vinne ein debatt mot Donald Trump, i alle fall på ein måte som faktisk betyr noko. Grunnen til at eg stilte spørsmålet, var at Trump etter objektive kriterium har tapt dei fleste valdebattane han har vore med i, men det har vist seg å bety svært lite i det lange løp.
No, med debatten godt i bakspegelen, kan vi sjå litt på resultata: Det ser ut for at Kamala Harris får eit løft på målingane. Like før debatten såg det ut for at Trump åt seg litt innpå leiinga til Harris, no dreg ho frå att. Skilnaden er framleis ikkje stor, om lag tre prosentpoeng på det nasjonale snittet av målingane, men det er framleis berre komme ut ei handfull målingar etter debatten.
Harris trefte ei nerve
