Grunngjevinga for å kasta Hallesby i gløymselens kjellar er ikkje heimla i rettvis rettargang

Ole Hallesby vigde store deler av livsverket sitt til Menighetsfakultetet (MF). Som professor i systematisk teologi frå 1909 til 1951 har han ein uslåeleg rekord. I mange år drog han så å seia kvar helg ut på reise for MF. Og i kampen mot den «liberale» teologien sto han i fyrste rekkje.

Det er difor ikkje til å undrast på at Hallesby for mange, vener som fiendar, var MF.

Men tidene har endra seg. Hallesby passar ikkje ved det nye MF. I eit slags intervju med rektor Vidar L. Haanes i Vårt Land 12. juni vert det rett nok sagt at fjerninga av Hallesby-bysten frå MF-biblioteket fyrst og fremst skuldast «praktiske årsaker».