Kyrkjerådet med ny smittevernrettleiar: – Viktig å ikkje lukke kyrkjedøra
KORONA: Den norske kyrkja og Norges Kristne Råd har kome med nye smittevernrettleiarar etter dei nye nasjonale koronatiltaka som trer i kraft natt til onsdag. – Det er viktig for mange å møte ei open kyrkjedør, skriv Den norske kyrkja.
UTANDØRS: I fjor heldt sokneprest Bård Haugstvedt julegudsteneste i Spydeberg utandørs. Det kan vera eit alternativ for kyrkjer også i år.
Foto: Morten Marius Larsen (CUSTOM_CREDIT)
– Ei stor utfordring no er å leggje om planane for julaftansgudstenestene på kort varsel. Det vil variere frå kyrkjelyd til kyrkjelyd, og dette jobbar ein med å vurdere lokalt no, seier kyrkjerådsdirektør i DNK, Ingrid Vad Nilsen.
Måndag kveld la regjeringa fram nye, nasjonale koronatiltak. Tysdag kveld kom Noreg Kristne Råd (NKR) og Den norske kyrkja (DNK) med sine smittevernrettleiarar som skal hjelpe alle dei tilsette og frivillige rundt i hundrevis av kyrkjelydar til å arrangere gudstenester og andre arrangement på trygt og lovleg vis.
Her skriv DNK at «i den situasjonen me no er i er det viktig å ikkje lukke kyrkjedøra, men heller vurdere kva av det planlagde som kan gjennomførast lokalt».
