– Koronapandemien har gjort det vanskelegare å jobbe mot menneskehandel, samstundes som bakmenn i endå større grad enn tidlegare har fått høve til å operere i det skjulte, gjennom mellom anna sosiale medium og nett, skriv fungerande dagleg leiar i A21 Norge, Sanan Weststeyn, i ei pressemelding.
At fleire har mista jobben, hatt ei usikker økonomisk framtid og dessutan vore meir heime og brukt tida på sosiale medium og internett på grunn av nedstenging har gjort dei meir sårbare, seier Weststeyn.
Derfor meiner organisasjonen som jobbar mot moderne slaveri at det er endå meir naudsynt og relevant å informere og gjera folk merksame på menneskehandel no enn før.
[ Gulrot fremfor pisk for å unngå moderne slaveri ]
Kristen kampsak
Laurdag samla gjekk over 300 menneske i stille mars gjennom Stavanger, Førde og Oslo for å setje fokus på menneskehandel og moderne slaveri. Samstundes har titusnar av menneske gjort det same i byar rundt i heile verda.
Arrangementet Walk for freedom, altså gå for fridom, er ei stille markering der ein ynskjer å spreie informasjon og gjera folk merksame på at det framleis finst menneske som lever i slaveri. Det er altså organisasjonen A21 som står bak marsjen, og det er det sjuande året Walk for freedom blir arrangert.
– Å vita at denne uretten går føre seg er eit svært viktig steg i retning av å avskaffe det moderne slaveriet, meiner A21-leiaren.
Estimat seier at over førti millionar menneske i dag er fanga i slaveri.
I ein Norad-rapport frå 2019, tinga av utanriksdepartementet, kjem det fram at moderne slaveri er ein av dei mest økonomisk utbytterike formene for kriminalitet, og at anslag viser at tvangsarbeid genererer 150 millionar dollar i ulovleg forteneste i året. Over sytti prosent av ofra er kvinner eller jenter.
Kampen mot det moderne slaveriet, som kan handle om alt frå tvangsarbeid, prostitusjon, tvangsekteskap og sal av organ, har blitt ein kampsak for mange kristne. Karismatiske kyrkjer som Hillsong, Salt og IMI har vist stort engasjement i saka. Grunnleggaren av A21 er Christine Caine, som har tilknyting til Hillsong.
[ Regjeringen skal bekjempe menneskehandel, men prioriterer ikke seksuelt slaveri ]
Er prisen på bilvasken urovekkande låg?
Om lag 150 dukka opp på markeringa i Oslo, og sjølv om det er litt færre enn tidlegare år er Weststeyn nøgd.
– Det kom fleire som aldri hadde vore med før, og me fekk veldig gode tilbakemeldingar både på appellane og markeringa generelt. Så me reknar det som ein suksess, seier ho til Vårt Land.
Weststeyn trur det var litt ekstra vanskeleg å mobilisere etter korona, og seier det kjennest som ein er litt tilbake i ein oppstartsfase att. Ho trur dei kjem sterkare tilbake til neste år.
Leif Tore Solberg, leiar av Safe House Filemon, eit butilbod for menn utsett for tvangsarbeid frå Frelsesarmeen, heldt appell under markeringa i Oslo. Han kom med ei direkte oppmoding.
– Du må spørje deg sjølv, er det du betalar for ei vare eller ei teneste ein rimeleg pris å betale? Er summen urovekkande låg for å få huset måla eller bilen vaska? Fekk du kvittering på det du kjøpte, eller betalte du kontant? Har dei arbeidsklede, brukar dei verneutstyr når dei gjer arbeidet? Me må våge å bry oss, spørje om dei som jobbar har det bra, og om dei kan snakka fritt.
[ USA-kritikk: Norge er ikke lenger et land som kjemper nok mot menneskehandel ]
