Religion

«Eg klarar det ikkje», sa David André Østby då han prøvde å synge i studio

HYMNER: Då lovsangsartisten følte seg utilstrekkeleg, blei musikken hans meir sann. No har Østby gitt ut plata han sjølv trengte. Sjå han framføre låtane her.

– Eg har faktisk aldri kjent meg så usikker på meg sjølv nokon gong.

David André Østby skildrar det siste året i studio fram mot plata Hymner. Lovsangsartisten har fem album bak seg, og har levd og ånda for musikk og formidling i årevis. Men plutseleg begynte han å tvile på gåvene sine – alt han eigentleg var trygg på, og elska.

– I løpet av tida i studio var eg igjennom heile følelsesregisteret. Det var ein lang prosess. Ein morosam prosess, men veldig krevjande, fortel han.

Prosessen blei til slutt til dei ni låtane på Hymner. Sjå Østby framføre dei i Markus kirke nedst i saka.

David Andre Østby, lovsang 19

Broten ned – bygd opp

Østby står framfor mikrofonen i studio. Han prøver å synge ei låt han kan så godt, ei låt han sjølv har skrive.

– Men usikkerheita blei overveldande. Eg måtte avbryte kvelden og seie «eg klarar det ikkje». Det var vondt å kjenne at eg kom til kort på noko eg eigentleg er trygg på.

Etterkvart forma plata seg. Fleire låtar kom på plass. Men Østby vurderte mange gonger å ikkje gi ut den nye musikken i det heile tatt. Var det bra nok?

Oslo 13.06.2018
David André Østby, musiker og lovsangpastor i Filadelfiakirken i Oslo. Her fotografert til MVT-serien i VL.
Foto: Joakim S. Enger

– Men der møter eg jo min eigen bodskap: Jesus seier eg er nok, når eg sjølv føler at eg ikkje strekker til.

– Eg har trengt dette albumet sjølv. Eg har trengt å verkeleg kjenne på tryggleiken i Gud, og finne styrken andre plassar enn i følelsane mine, deler Østby.

Ikkje bare bibelord å «slenge ut»

Men er det ikkje eit paradoks? At Østby eigentleg kjenner seg djupt usikker, men likevel står i studio og syng om tryggleiken trua gir han?

Nei, det er snarare motsett, meiner han sjølv.

– Det siste året har eg vore enno djupare nedi livets erfaringar, og eg har levd i dei når eg har spelt inn plata. Det trur eg har gjort bodskapen i musikken nærare og meir ekte.

Tekstane på Hymner er ikkje bare noko Østby har «høyrt og lest». Han har erfart dei oppriktig sjølv.

– Det kan av og til bli bibelord ein bare «slenger ut». Men når eg har kjent meg så svak, forstår eg òg Guds storheit mykje betre. Eg treng Han.

– For meg handla det om å gi slepp, og kvile i nåden eg har skrive om heile livet.

---

David André Østby

  • Musikar, pastor og lovsangsleiar i Filadelfia Oslo.
  • 40 år gammal.
  • Har gitt ut seks album, det siste Hymner i 2021.

---

Menneskelege erfaringar

Etter at han delte tankar og erfaringar frå ei krevjande tid i livet – med panikkangst, samanbrot, vekeslange migrener og utbrentheit – har folk takka Østby for at an var så åpen. Han erkjenner at han som lovsangsleiar kan ha skapt eit inntrykk av å alltid vere glad og vellukka.

– Det har jo vore mitt virke, å få folk til å sjå det positive i livet gjennom Gud. Men derfor trur eg at musikken eg gir ut no har enno større truverd. Gud tar oss ikkje forbi problema våre, men leier oss gjennom utfordringane.

– Mange har mørke, iallfall grå, dagar no. Responsen etter at eg delte har vist at me treng å vite at me ikkje er åleine i å gå igjennom desse tinga. Det hjelper ofte å bare åpne seg.

David Andre­ Østby leder lovsangsarbeidet i ­Filadelfiakirken Oslo, og har ­skrevet en rekke populære lov­sanger.

Ein viktigare påskebodskap

Han trur at påskas bodskap kan treffe oss enno sterkare i år. Østby kallar det eit slags «kollektivt traume», det me går igjennom av isolasjon og einsemd i pandemien.

– Me har eit år bak oss kor me har kjent på noko av den lidinga som påska viser oss. Forteljinga om at Jesus lir for oss, koplar me oss kanskje på på ein litt annan måte i år.

David Østby - Hymner-konsert i Markus kirke

Kanskje treng me bodskapen i forteljinga også enno meir i 2021, trur Østby.

– Men eg trur, på motsett side, at me òg forstår betre håpet betyr. Og me treng det kanskje tydelegare enn før.

– No har kyrkja ein sjanse til å formidle denne fantastiske beskjeden til nordmenn flest: Det som nullstilte historia, og skapte eit før og eit etter. Me lever i håpets tidsalder!

Sjå påskekonserten her

Dette håpet passa bra å gi ut til påske, syntest Østby. Plata som kom på skjærtorsdag er meir «sakral» enn før. På Hymner har han fått med seg både Solveig Leithaug, Josefina Gniste, Karoline Neteland, Oslo Soul Teens og Gospel Explosion som gjesteartistar.

I ei tid kor me ikkje kan samlast i til høgtid kyrkja, ville lovsangsartisten gjere det beste ut av situasjonen. Det blei til denne konsertopplevinga frå Markus kirke i Oslo.

Den kan du sjå her:


Les mer om mer disse temaene:

Ruth Einervoll Nilsen

Ruth Einervoll Nilsen

Vårt Land anbefaler

1

1

1

1

Annonse
Annonse

Mer fra: Religion