Presten blei fjerna frå kyrkjelyden – hundrevis tente faklar til støtte for å behalde han

Etter fleire år med uro på arbeidsplassen tok Stavanger-biskop Anne Lise Ådnøy eit drastisk grep denne veka: Sokneprest i Jørpeland menighet, Bård Boye, må endre tenestestad, og blei tatt vekk frå kyrkjelyden i Ryfylke 10. februar.

Det har opprørt lokalbefolkninga. Torsdag kveld hang kyrkjelydsmedlemmer og folk frå bygda opp plakatar med teksten «Bård og Mette – Jørpeland trenger dere, Jørpeland står bak dere» på kyrkjedøra, dei sang signinga i kor og sette faklar på kyrkjetrappa for å vise støtte til presten som no blir tatt frå dei.

– Sjølv i denne kulda har folk møtt opp. Det er fantastisk å sjå, fortel kyrkjegjengar Kjell.

«Me har aldri før hatt ein slik prest» er ei setning som går igjen blant fleire Vårt Land snakkar med denne kvelden.

– Heile bygda står bak han, kyrkjegjengar eller ei. Bård er klar og tydeleg i forkynninga, og evner å få god kontakt med alle typar folk, seier Kjell.

– Presten ønsker sjølv å bli, så me forstår ikkje kva som skjer. Me er frustrerte, og vil behalde den fantastiske presten vår, fortel han.

[ Konflikten i Jørpeland menighet: Fekk arbeidsmiljøet granska ]

Kollega: – Blir ikkje lytta til

Jørpeland er blant dei best besøkte kyrkjelydane i Stavanger bispedømme, noko fleire av dei frammøtte hyllar sokneprest Bård Boye for. Også i kollegiet skapar flyttinga frustrasjon.

– Eg forstår ikkje at dei tar bort den eine personen i teamet som alle vil snakke med, han som er ein god lyttar, stiller dei gode spørsmåla og er ein samlande figur, fortel barneleiar Elin Fiskå Skårland til Vårt Land.

Ho meiner at soknepresten ikkje står i sentrum av konflikta som har pågått ved kyrkjelydskontoret, og at det er påpeikt at han ikkje har gjort noko gale.

– Situasjonen blir ikkje betre ved å fjerne den gode presten vår. Me er fleire som har ønskt hjelp til nye samtalar og forsoning, med ein uavhengig aktør som tilretteleggar. Men no blir Boye fjerna før dette forslaget til løysing blir tatt opp av fellesrådet, seier Fiskå Skårland.

– Eg, og fleire med meg, føler ikkje at våre erfaringar har blitt høyrde på. Eg føler meg heilt makteslaus, og ganske sint, fortel ho.

Vårt Land får også stadfesta at frivillige i kyrkjelyden har trekt seg frå tenestane sine på sundag på grunn av den betente situasjonen.

– Utan makt

Stavanger-biskop Anne Lise Ådnøy ønskjer ikkje å kommentere konflikten utover det ho tidlegare har sagt, men skriv til Vårt Land torsdag kveld at:

«Samtidig forstår jeg veldig godt at saken angår mange og at folk er frustrerte over å ikke få vite mer. Men det ville være helt feil å gå ut med flere detaljer i en såpass kompleks og sår sak.Jeg skjønner at noen kan være opprørte over denne avgjørelsen, men er trygg på at det var riktig å gjøre nå».

Det er ikkje folket på kyrkjeplassen på Jørpeland einige i.

– Situasjonen er heilt uverkeleg, gestikulerer Lars Meling Hultin på trappa torsdag kveld.

Han skildrar Bård Boyes ufrivillige avgang som «eit maktovergrep».

– Her står me som medlemmer utan makt til å gjere noko anna enn å møte opp her, vise støtta vår og tenne lys. Eg trur oppmøtet seier sitt, fortel han Vårt Land.

«Eg blir rørt» seier han vidare, og fortel at han har sett mange som ikkje pleier gå i kyrkja møte opp likevel.

– Dei bryr seg, fordi Bård gjer eit slikt inntrykk på ein. Trass alt han har opplevd dei siste åra, står han støtt, og berre er god. Eg forstår ikkje det er mogleg, seier Meling Hultin.

Han får støtte av Tormod, som eigentleg sokner til ein annan kyrkjelyd.

– Når det gjeld å støtte Bård, gjer eg det med stor iver. Eg seier det kvar gong eg høyrer han: Det er noko inderleg, noko ærleg, noko velmeint ved Bård. Dette brenn han for. Derfor er denne situasjonen så uverkeleg, seier han.

[ Slik er dei kristne der du bur ]

---

Dette er saka:

• I juni blei ei fleirårig personalkonflikt ved Jørpeland kyrkjelyd i Ryfylke prosti i Stavanger bispedømme kjend for offentlegheita.
• Som ein del av arbeidet med å løyse konflikta, blei det utarbeida ein rapport om arbeidsmiljøet. Den har verken fellesrådet eller Stavanger-biskopen ønskt å kommentere.
• Tysdag 9. februar bestemte biskop Anne Lise Ådnøy at sokneprest Bård Boye må endre tenestestad. Frå 10. februar skal han ut i studiepermisjon i fire månadar. Etter det får han ein annan arbeidsstad.
• Både i sommar og i februar har lokale krefter samla seg for å støtte soknepresten. Medlemmer og kollegar meiner det er feil løysing på konflikta at ein godt likt sokneprest og kollega blir flytta.

---