Sjefen kalla han «talknusar»: E-postar viser at Sindre Finnes kontakta Statsministerens kontor med tips
AKSJESAK: Norsk Industri har sagt at Sindre Finnes berre skulle jobba som «talknusar». E-postar viser at at Statsministerens kontor sette i gang undersøkingar etter tips frå Sindre Finnes då kona var statsminister.
KONTAKT: E-postar som Vårt Land har fått innsyn i, viser at Sindre Finnes i 2020 kontakta media og Statsministerens kontor med tips om ei vaksinesak.
Tuva Åserud/NTB
«Dette er godt vaksinenytt, som kanskje kan gi grunnlag for en artikkel om mulig norsk vaksineproduksjon.»
Slik starta Sindre Finnes ein e-post han sende til ein journalist i avisa Dagens Næringsliv (DN) 26. august 2020. Denne e-posten formidla han så vidare til Statsministerens kontor.
På dette tidspunktet var kona hans, Erna Solberg, statsminister i Noreg. Sindre Finnes arbeidde som fagsjef i bransje- og industripolitisk avdeling i Norsk Industri.
