Nyheter

KrF-Ulstein aukar bistandsbudsjettet med 3,8 milliardar

STATSBUDSJETT: Bistandsminister Dag Inge Ulstein følger opp tidlegare lekkasjar og auker bistandsbudsjettet med 3,8 milliardar kroner. Ein femdel av pengane skal gå til klimatiltak.

Tysdag legg den avtroppande regjeringa fram statsbudsjettet for 2022. Her aukar bistand frå 38,1 til 41,9 milliardar kroner, opplyser utviklingsminister Dag Inge Ulstein Vårt Land.

Ulstein lova i Vårt Land i september ei bistandsauke på 3,1 milliardar kroner. No ender altså auka opp på 3,8 milliardar kroner.

Dette er ei auke på rundt 10 prosent frå året før.

Auken vil sikra at regjeringa når målet om at bistand skal utgjera ein prosent av antatt bruttonasjonalinntekt (BNI).

8,2 milliardar til klimatiltak

Ulstein varslar at pengane skal vris i retning klimabistand:

  • Ein femdel av budsjettet, 8,2 milliardar, skal brukast på klimatiltak. Det er ei auke på om lag 2 milliardar.
  • Regjeringa aukar budsjettet til klimatilpassing med 500 millionar. Pengane vil mellom anna gå til varslingssystem og klimatilpassa matproduksjon.

– Orkanar og syklonar raserer hus og infrastruktur, tørke trugar livsgrunnlaget, og flaum rammar millionar av menneske kvart år. Derfor er det så viktig at ein større del av pengane går til klimatilpassing, skriv Ulstein i ein e-post til Vårt Land.

Kallar klimafond ein «ein milepæl i norsk bistandshistorie»

Statsbudsjettet følger også opp eit tidlegare løfte:

  • Ein milliard frå det statseigde investeringsselskapet Nordfond skal brukast til eit nytt klimafond. Fondet skal investera i fornybar energi i utviklingsland med mål om å bidra til reduserte klimagassutslepp.

Dag Inge Ulstein kallar klimafondet for eit av «KrF sine viktigaste gjennomslag i regjeringa» og «ein milepæl i norsk bistandshistorie».

– Eg håpar klimafondet vil inspirera andre land til å sjå til Norge og at dei vil koma med liknande bidrag under klimatoppmøtet i november, skriv Ulstein i ein e-post til Vårt Land.

Klimafondet skal investera minst 10 milliardar kroner over fem år i fornybar energi, og det skal mobilisera kapital frå privat sektor.

I tillegg har regjeringa vedteke å auka fornybarandelen til Norfund frå 50 til 60 prosent over tid.

Ber Ap og Sp om å følga opp

Ulstein har vore utviklingsminister i Solberg-regjeringa sidan 2019. Snart kjem nye ministrar til.

Ap-leiar Jonas Gahr Støre og Sp-leiar Trygve Slagsvold Vedum har varsla at dei vil legge fram den nye regjeringas politikk onsdag.

Ulstein kjem med ei klar oppmoding:

– Eg håpar verkeleg ikkje at den nye regjeringa vil svekka klimasatsinga me legg opp til. Med auka til klimatiltak er me i rute til å dobla klimabistanden innan 2025.

Biden auka støtte til klimafinansiering

Klimafinansiering er i vinden. I slutten av september gjekk USAs president Joe Biden på talarstolen under FNs hovudforsamling og lova å dobla bidraget til klimafinansiering. Løftet er på 11,4 milliardar dollar, rundt 97 milliardar kroner.

– Dette vil gjera USA leiande i klimafinansiering, sa Biden ifølgje NTB.

Han bad andre land forplikta seg til større bidrag før haustens klimatoppmøte i Glasgow, som varar frå 31. oktober til 12. november.


Les mer om mer disse temaene:

Maria Lavik

Maria Lavik

Maria Lavik er journalist i Vårt Lands nyhetsavdeling

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter