Nyheter

Resultat av valet: KrF får ekstra ordførar – alle 11 er menn

MAKTSKIFTE: Senterpartiet blei den store valvinnaren i Vest-Agder. Trøysta for KrF er at partiet får meir ordførarmakt. Alle 11 KrF-ordførarane er menn.

Stortingsvalet blei ein stor opptur for Senterpartiet. Det blei valvinnar nasjonalt – og i valdistriktet Vest-Agder.

Veljarane sende Ivelands ordførar Gro-Anita Mykjåland til Stortinget. Der blir ho fram til neste val, i 2023.

Trøystepremien for KrF, som også kunne notere framgang i Vest-Agder, er at partiet no får ordføraren i Iveland.

– Eg gler meg, dette blir spanande, fortel Terje Møkjåland til Vårt Land.

Eg gler meg, dette blir spanande

—  Terje Møkjåland, påtroppande KrF-ordførar i Iveland kommune

Blir ordførar måndag

Måndag er det tillyst ekstraordinært kommunestyremøte i Iveland. Då blir KrFs Møkjåland valt til ordførar. I dag er han varaordførar.

Etter kommunevalet i 2019 blei Sp og KrF samde om å dele makta i Iveland. Sp fekk ordføraren medan KrF fekk varaordføraren.

– Du såg at dette skifte ville kome då Senterpartiet fekk gode målingar?

– Ja, eg kunne bu meg på å bli ordførar, for Gro Anita ville kome på Stortinget.

11 menn

Rokeringa i Iveland betyr at no har KrF 11 ordførarar;

• Kvitsøy, Hå, Sokndal i Rogaland.

• Vegårshei, Kvinesdal, Vennesla, Froland i Agder.

• Fitjar i Vestland.

• Giske i Møre og Romsdal.

• Skjervøy i Troms og Finnmark.

Og alle er menn.

– Kva tenkjer du om at alle KrFs ordførarar er menn, Møkjåland?

– Det er ikkje bra, det er det absolutt ikkje.

– Kva skal de gjere for å endre dette bilete?

– Fram mot kommunevalet i 2023 må partiet få fram fleire kvinnelege ordførarkandidatar.

Sluttar som lærar

Terje Møkjåland er i dag skogbrukslærar på den kristne vidaregåande skulen KVS Bygland i Setesdal. No blir han ordførar på full tid, arbeidsgjevar var budd på at han søkte permisjon. Varaordførarstillinga var på ti prosent.

– I tillegg er eg gardbrukar, så det blir ikkje mange fristunder.

KrFs 11. ordførar er også nybakt trebarnsfar.

– Det blir travelt, men det skal gå bra.

Les mer om mer disse temaene:

Bjørgulv K. Bjåen

Bjørgulv K. Bjåen

Bjørgulv K. Bjåen er journalist i nyhetsavdelingen i Vårt Land.

Vårt Land anbefaler

1

1

1

1

Annonse
Annonse

Mer fra: Nyheter