Ulstein: – Det Vedum seier om KrF er sjokkerande og smått absurd

– Det Vedum seier om KrF er sjokkerande og smått absurd. Eg synest det er trist når dette kjem frå Senterpartiet, som vi har hatt eit så nært forhold til tidlegare og som vi har stått tett saman med i mange saker, seier Ulstein.

Det han reagerer på, er påstandane Trygve Slagsvold Vedum kom med i eit sommarintervju i Vårt Land. Der sa Vedum at grunnen til at det går så bra med hans eige Sp, og så dårleg med KrF og Venstre, er at dei to andre partia har svikta sentrumsverdiane.

[ Vedum skuldar KrF og V for å ha forlate sentrum ]

– Trudde ikkje mine eigne øyre

Ulstein meiner tvert om at om det er nokon som har forlate sentrum, så er det Senterpartiet.

– Eg trudde nesten ikkje mine eigne øyre då Vedum sto saman med Sylvi Listhaug og ønskte at Noreg skulle ta dei vaksinane som Noreg hadde donert til helsearbeidarar og sårbare eldre i verdas fattige land, og i staden prioritere fleire vaksinedosar til oss. Eg trudde aldri eg skulle høyre ein slik direkte vaksinenasjonalisme frå Senterpartiet, seier Ulstein.

Eit sentrumsparti kan ikkje kaste internasjonal solidaritet, nestekjærleik for flyktningar og forfølgde og forvaltaransvaret over bord, utan å miste seg sjølv.

Han framhevar dette som eitt av fleire døme på at det er Sp som har svikta sentrumsverdiane, og ikkje KrF. Han trekk også fram klimapolitikken, flyktningpolitikken og internasjonal solidaritet. Også der meiner Ulstein at Sp har lagt seg tett opp mot Frp, og på den måten forlate dei felles verdiane som tidlegare eksisterte blant sentrumspartia.

– Eit sentrumsparti kan ikkje kaste internasjonal solidaritet, nestekjærleik for flyktningar og forfølgde og forvaltaransvaret over bord, utan å miste seg sjølv. Det er det Senterpartiet held på å gjerne no.

[ KrF kritiserer Vedum si «Noreg først»-haldning ]

Populisme

– Men Vedum har jo rett i at Sp gjer det bra på målingane, og at KrF og Venstre gjer det dårleg. Om det ikkje skuldast at de har forlate sentrumsverdiane, kva skuldast det då?

– Vedum spelar på populistiske saker og legg langt ut på fløya til Frp, for å vinne stemmer. For min del vil eg då heller gjere det som er rett, seier Ulstein.

Han viser til flyktning- og asylpolitikken som ei område der Sp etter hans meining bryt med grunnleggande sentrumsverdiar.

– I arbeidet for flyktningar og forfølgde var Senterpartiet tidlegare ei kraft. No er dei enten musestille, eller så konkurrerer dei med FrP og Arbeidarpartiet om å vere strengast i klassen. Når Vedum går ut og påstår at KrF har bevegd seg bort frå sentrum, så er det å snu ting fullstendig på hovudet. Her må han gå i seg sjølv.

[ Sp gjer flyktningvri som får kritikk frå V og KrF ]

Medviten kursendring

I intervjuet med Vårt Land løfta Vedum særleg fram det han meiner er sentraliseringspolitikken til regjeringa, som eit brot med motkultur og sentrumsverdiar. Særleg regionsreforma var senterpartileiaren kritisk til.

– Vi har hatt både bondeopprør og distriktsopprør retta mot ei regjering som er KrF og V er ein del av. Meiner du at regjeringa er god nok på landbrukspolitikk og distriktspolitikk, eller har Vedum eit poeng når han kritiserer akkurat dette som eit brot med motkulturelle sentrumsverdiar?

– Alle veit at ein må gjere kompromiss i regjering, og det er ikkje alltid ein får gjennomslag. Men det er stor skilnad på det, og å medvite legge om kursen i viktige verdisaker slik Senterpartiet har gjort, svarar Ulstein.