Nyheter

– Det kan bli det beste valet Etiopia nokon gong har hatt

VAL: Etnisk vald, svolt og ramsalt internasjonal kritikk dannar bakteppe for mandagens val i Etiopia. Kirkens Nødhjelps landdirektør er likevel forsiktig optimist.

Mandag går etiopiarane til stemmeurnene. Dei skal velja inn 547 medlemmer til parlamentet, der leiaren for det vinnande partiet også blir statsminister.

Sitjande statsminister Abiy Ahmed vart tildelt Nobels fredspris i 2019. Han møter mykje kritikk både internasjonalt og internt i landet:

  • Konflikten i provinsen Tigray vart teke til eit nytt nivå denne veka. Finlands utanriksminister og EUs spesialutsending Pekka Haavisto skulda etiopiske leiarar for å ha uttalt at dei ønsker å utsletta tigrayene. – For oss ser dette ut som etnisk reinsing, sa Haavisto.
  • Veka før brukte FNs naudhjelpskoordinator ordet hungersnaud for å skildra situasjonen i Tigray.
  • Fleire parti boikottar valet på mandag. Mellom dei er The Oromo Liberation Front (OLF), eit av dei eldste partia I landet. Dei mobiliserer veljarar som tilhøyrer den etniske gruppa oromo, som statsminister Abiy Ahmed tilhøyrer.
  • Uro og vald i fleire provinsar gjer at det ikkje bli halde val i 102 av landets 547 valkretsar.

Statsministeren har starta nytt parti

– Dei eg snakkar med, er spente. Me held kontoret stengt på mandag, dels for å vera på den sikre sida.

Det seier Eivind Aalborg, som bur i hovudstaden Addis Abeba og jobbar som landdirektør for Kirkens Nødhjelp.

Han er forsiktig optimist, og peikar på at over 37 av dei rundt 50 millionar stemmeberettiga, har registrert seg for å kunna stemma.

– Eg tenker det er ganske bra. Så får me sjå mandag om folk faktisk møter opp og stemmer.

Sitjande statsminister Abiy Ahmed stiller denne gong til val med det nydanna partiet the Prosperity Party, eller Velstandspartiet.

– Det er ein type sosialdemokratisk parti, som også vil liberalisera deler av den økonomiske politikken. Abiy Ahmed prøver å skapa eit parti som femner breitt og når ut til ulike etniske grupper. Dei fleste trur dette velstandspartiet vil vinna valet.

Om partiet vinn med overveldande margin, vil resultatet som kjem seinare frå provinsane der valet er utsett, ikkje påverka valet av statsminister.

Kritikken kan styrka statsministeren

Kirkens Nødhjelp er på plass i Tigray-provinsen nord i landet. Kampane står mellom den etiopiske hæren og Tigray-folkets frigjeringsfront (TPLF). I tillegg deltek militsar og eritreiske styrker på sida til Etiopia.

– Eg har inntrykk av at det er dei eritreiske soldatane oppfører seg verst og gjer mest skade. Det er ikkje tvil om at konflikten i Tigray er alvorleg, seier Aalborg.

Han seier den massive internasjonale kritikken mot statsminister Abiy Ahmed kan få ei uventa effekt.

– Paradoksalt kan dette føra til at han gjer eit godt val. Mange etiopiarar meiner denne kritikken er urettvis. Mitt inntrykk er at hans visjon om å gjera landet meir demokratisk og einskapleg framleis står ved lag. Men Etiopia er eit krevjande land å styra, med mange konfliktar og ein autoritær tradisjon.

Eivind Aalborg i Kirkens Nødhjelp håpar og trur valet kjem til å vera fredeleg.

– Valet kjem ikkje til å bli perfekt, men det kan bli det beste valet Etiopia nokon gong har hatt.

---

Val i Etiopia

  • Mandag er det parlamentsval i Etiopia. Leiaren for det vinnande partiet blir også statsminister.
  • Uro i fleire provinsar gjer at det ikkje bli halde val i 102 av landets 547 valkretsar.
  • Sitjande statsminister Abiy Ahmed vart tildelt Nobels fredspris i 2019. Han stiller til val med det nydanna the Prosperity Party.
  • Valet er alt blitt utsett to gonger på grunn av koronapandemien.

---

Les mer om mer disse temaene:

Maria Lavik

Maria Lavik

Maria Lavik er journalist i Vårt Lands nyhetsavdeling

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter