Ein av dei som har måtta sjå langt etter ny jobb, er Ib Thomsen:
– Som politikar i 30 år og med 12 år på Stortinget hadde eg trua på ny jobb etter valet, men eg har ikkje fått noko, fortel han Vårt Land.
– Kva er forklaringa?
– Alderen, heilt klart. Eg er 57 år, og er med det mindre etterspurt, seier Thomsen, som også trur at åra som profilert Frp-politikar kan vere eit hinder. Før han kom på Stortinget i 2005, arbeidde Thomsen i privat næringsliv. Han takka nei til attval.
LES MEIR: Politikere vurderer å slutte
66 prosent
Stortingsrepresentantar som ikkje blir attvalt, eller som ikkje stiller til val, kan søkje om tre månader med full lønn frå oktober og ut året. Etter årets justering av godtgjeringa tener ein representant no 956.463 kroner.
Men dei som står utan jobb ved årsskiftet, altså tre månader etter eit stortingsval, kan søkje om etterløn i inntil eitt år. Dei som får innvilga søknaden får «66 prosent av ordinær lønn, med fradrag for eventuelle inntekter». 66 prosent er i dag 631.265 kroner.
20 år
Stortinget opplyser at i desember 2018 får 14 tidlegare stortingsrepresentantar etterløn. Seks av dei kjem frå Framstegspartiet medan fem er frå Arbeidarpartiet. Dei tre siste kjem frå Høgre og KrF.
Mange av dei som har gått på etterløn i år, har lang fartstid frå Stortinget. Øyvind Korsberg var folkevalt frå Troms og Frp i heile 20 år, eller fem periodar, frå 1997 til 2017. I fjor takka han nei til attval, og i desember fortalde han avisa Nordlys at han hadde meldt seg ut av Frp. Vårt Land lukkast ikkje med å få tak i Korsberg i går.
Framstegspartiet
Dei 13 andre på etterløn ut 2018 er desse, opplyser Stortinget:
Jan Arild Ellingsen (Frp), på Stortinget 2001-2017.
Ib Thomsen (Frp), på Stortinget 2005-2017.
Jan Henrik Fredriksen (Frp), på Stortinget 2005-2017.
Ingebjørg Amanda Godskesen (Frp), på Stortinget 2009-2017.
Oskar J. Grimstad (Frp), på Stortinget 2009-2017.
Sonja Mandt (Ap), på Stortinget 2005-2017.
Freddy de Ruiter (Ap), på Stortinget 2005-2017.
Kåre Simensen (Ap), på Stortinget 2009-2017.
Stine Renate Håheim (Ap), på Stortinget 2009-2017.
Kjell-Idar Juvik (Ap), på Stortinget 2013-2017.
Erik Skutle (Høgre), møtte fast som representant på Stortinget 2013-2017, for statsminister Erna Solberg.
Laila Davidsen (Høgre), møtte fast som representant på Stortinget 2016-2017, for statsråd Frank Bakke-Jensen.
Rigmor Andersen Eide (KrF), på Stortinget 2009-2017.
LES MEIR: Pene politikere vinner valg
Utdanning
Ingebjørg Godskesen søkte ein tredje periode som stortingsrepresentant for Aust-Agder Frp, men blei vraka i ein opprivande nominasjonsstrid i fylkespartiet. Før ho kom på Stortinget i 2009, hadde Godskesen arbeidd i NSB og Kristiansand kommune og som regionssekretær i Aust-Agder og Vest-Agder Frp.
– Eg har aktivt søkt jobbar sidan juli, men har ikkje fått napp. Eg har også teke etterutdanning i leiarskap, utan å nå opp, seier ho som meldte seg ut av Frp før valet i fjor.
Arbeid
Stortinget opplyser til Vårt Land tre eks-representantar som starta året på etterløn har fått jobb i løpet av 2018:
Frå januar 2018 fekk 17 personar tilkjent etterløn, «fire av disse er studenter og har mottatt ytelsen hele året».
Frå mai var det 16 etterlønsmottakarar.
Frå september var det 15 på etterløn.
I desember har «14 personer mottatt etterlønn».
