Nyheter

Vil forby hijab i skulen

Frp ønskjer forbod mot hijab i grunnskulen, og får Høgre-støtte. I Oslo ber det raudgrøne byrådet Høgres kunnskapsminister om hjelp til å løyse ein hijabstrid.

Framstegspartiet er kompromisslause i synet på tre tekstilar, som muslimske kvinner gjer bruk av:

«FrP mener at hijab, niqab og burka er kvinneundertrykkende plagg. Disse skal derfor ikke brukes i grunnskolen», skriv programkomiteen i utkastet til nytt program for stortingsperioden 2017-2021. Partiet varslar at dei ser annleis på hijab enn regjeringskollega Høgre.

LES MEIR Nektet å klippe kunde med hijab

Ikkje i programmet

Men også i Høgre er det fleire som tek til orde for eit hijabforbod i grunnskulen. På fylkesårsmøtet til Telemark Høgre fremma Mahmoud Farahmand eit resolusjonsforslag der han mellom anna skreiv dette:

«Muslimske foreldre som ikler sine barn hijab har et ønske om å kontrollere sine barn og å forme deres identitet. Bruk av Hijab er ikke påkrevd i islam, men anbefalingen begrunnes i stor utstrekning med å skjerme seksualiteten.»

Farahmand er også talsmann for organisasjonen LIM, eit «talerør for liberale og sekulære verdier». Han ønskjer at Høgre går inn for eit forbod mot hijab i grunnskulen. Forslaget blei sendt partiets programkomité, som blir leia av Torbjørn Røe Isaksen. Men det er ikkje med i førsteutkastet som er ute på høyring i partiet.

Den same Røe Isaksen varsla i haust, som kunnskapsminister, at han vil regulere bruken av niqab og burka i utdanninga, frå grunnskule til universitet.

Gagnar barn

Til Vårt Land seier Mahmoud Farahmand, som sit i Porsgrunn bystyre for Høgre, at «folkevalde må våge å ta upopulære avgjerder». Ei slik avgjerd å regulere bruken av hijab i grunnskulen.

– Når kunnskapsministeren skal lage eit regelverk for bruk av niqab og burka, burde han teke steget fullt ut og teke med hijab.

Farahmand seier at fordi «vi alle er nordmenn», må vi byrje å spørje oss kva som «gagnar barna våre best».

– Dei gongene eg har spurt barn om kvifor dei brukar hijab, har dei svart at imamen eller foreldre oppmodar eller pålegg barna å bruke plagget.

Slike svar opprører Høgre-politikaren:

– Slike haldningar fremmar segregering, ikkje integrering.

Rett veg

Kravet om hijabforbod i grunnskulen blei fremma på Høgres landsmøte i vår av fylkeslaget i Nord-Trøndelag, som meinte eit forbod vil vere god Høgre-politikk. Forslaget blei avvist.

– Vi blei til dels gjort til latter. Men samfunnsdebatten etter landsmøtet har vist at vi var på rett veg, seier Anders Kiær, leiar i Nord-Trøndelag Høgre, og viser til kunnskapsministerens regelverk for bruk av niqab og burka.

LES MEIR Frisør anker hijabdommen

Varsel i Stortinget

Sjølv om Røe Isaksen ikkje har funne det naudsynt å seie noko om ansiktsplagg i partiprogrammet – slik Frp gjer, varsla statsråden, i trontaledebatten i Stortinget, at han vil regulere bruken av ansiktsplagg.

I arbeidet med det nasjonale reglar vurderer Høgre-statsråden om forbodet skal gjelde berre i klasserommet på grunnskular, vidaregåande, høgskular og universitet eller også i heile undervisningsbygget og på området til utdanningsinstitusjonen.

Utvide forbod

Oslo Høgre er ikkje i tvil. Fylkeslaget i hovudstaden gjekk mot programkomiteens forslag og vedtok sist helg å gå inn for forbod mot heildekkande ansiktsplagg også i offentlige institusjonar, ikkje berre på utdanningsinstitusjonar.

Jenters fridom

I Nord-Trøndelag Høgre er leiar Kiær tydeleg på kva han ønskjer seg:

– Eit forbod mot hijab i grunnskulen. No får vi sjå kva reglar kunnskapsministeren kjem med, men eg hadde helst sett at han også inkluderte hijab i regelverket. Denne saka handlar om personleg fridom for unge jenter. Dei skal få utfolde seg like fritt som jamaldrande jenter som ikkje brukar hijab.

Hagen-forslag

Medan Røe Isaksens departement arbeider med niqab- og burkaregelverket, skal det også løyse ein hijabfloke i Oslo.

I eit brev til Kunnskapsdepartementet frå oppvekst- og kunnskapsbyråd Tone Tellevik Dahl (Ap) ber det raudgrøne byrådet om ei hijabvurdering:

«(...) ber byrådsavdelingen om Kunnskapsdepartementets vurdering av hjemmelsgrunnlaget for eventuelt å innføre et hijabforbud i skolen i dag.»

Byrådssekretær Halvard Hølleland (Ap) opplyser at kommunen slett ikkje har tenkt å innføre eit slikt forbod:

– Vi må følgje opp eit forslag frå Frps Carl I. Hagen, som i desember i fjor fremma eit privat forslag i bystyret om å forby hijab i skulen.

LES MEIR SV, hijaben og kristendommen

Fjerne tvil

Først sende byrådsavdelinga hijabspørsmålet til Justisdepartementet. Her hintar Oslo kommune frampå om kva som kunne bli svaret frå departementet. Kommunen skriv at det «antas at opplæringslovens hjemler neppe gir grunnlag for et generelt forbud mot hijab i skolen».

Men Justisdepartementet svarte at Oslo kommune må ta saka opp med Kunnskapsdepartementet. Snart eit år etter at Hagen frå Frp fremma lovforbodet, ventar det raudgrøne byrådet på eit svar som kan parkere saka.

– Vi vil ha eit svar som ikkje etterlet rom for tvil. Men vi skal svare Hagen på ein korrekt måte, seier Hølleland.

Følg oss på Facebook og Twitter!

Les mer om mer disse temaene:

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter