Slår hardt ned på journalistikk

– Eg har blåmerker over heile kroppen, eg har blitt slått med stokkar. Det er ein skam av pakistansk politi at dei oppfører seg sånn mot pressa. Eg lurer på korleis dei oppfører seg mot pakistanske journalistar, det må vere endå verre, sa Kadafi Zaman til VG mandag etter at rettsmøtet for saka hans var over. Der vart han lauslaten mot kausjon.

Fredag vart Zaman arrestert då han dekka ein demonstrasjon som journalist i byen Gujrat i Punjab-provinsen. Demonstrantane støtta den korrupsjonsdømte, tidlegare statsministeren Nawaz Sharif, og partiet Pakistan Muslim League-N.

– Eg skulle rapportere om korleis han vart tatt imot av sine tilhengjarar. Det eg vart vitne til, var at politiet gjekk til åtak på dei politiske aktivistane med stokkar. Dette skjer kort tid før valet, seier Zaman til TV 2.

Sensur

Tidlegare i år har styresmaktene tatt fleire grep for å hindre kritisk mediedekning, ifølgje Al Jazeera. Ein av dei mest kritiske TV-kanalane i Pakistan vart tatt av lufta i april, og fekk ikkje lov til å kome tilbake på TV-nettet før dei hadde gått med på å endre kanalen sin politiske dekning.

Seinare vart den største engelskspråklege avisa i landet stoppa i ein periode, etter at dei hadde trykt eit intervju med Nawaz Sharif, der han kritiserte hæren.

Hæren sin talsperson Asif Ghafoor kunngjorde på ein pressekonferanse i juni at dei overvakar sosiale medier og «kven som gjer kva». På pressekonferansen viste han fram sosiale medie-kontoar til journalistar han hevda er ein trugsel.

Den som skal styre landet etter valet er avhengig av å vere på godfot med hæren, som har mykje makt i den pakistanske staten.

LES MEIR: Fundamentalistar til val i Pakistan 

Maktspel

Fleire journalistar har meint at hæren i Pakistan favoriserer kandidaten Imran Kahn, som er hovudmotstandaren til Muslim League-partiet. Desse påstandane forklarer mellom anna kvifor politiet stoppa Muslim League-demonstrasjonen i Gujrat fredag, der Kadafi Zaman og fleire andre journalistar vart arrestert.

Éin av grunnane til at militæret blir skulda for å støtte Kahn, er at den tidlegare statsministeren var i konflikt med hæren. Nawaz Sharif har meint at sivil makt bør stå over militær makt.

– Det har vore ei rift mellom Nawaz Sharif og den pakistanske hæren. Hæren og etterretninga er veldig mektige i Pakistan, men Sharif har ikkje hatt hæren på si side, seier Terje Skaufjord, som er lektor og har skrive bok om Pakistan.

Politisk hær

Han er einig i at den pakistanske hæren kan sjå ut til å arbeide mot Muslim League-partiet, som no er leia av Nawaz Sharif sin bror, Shahbaz Sharif.

– Basert på korleis hæren oppfører seg no, så kan det tyde på at dei favoriserer Kahn. Dei bestemte seg for å ta Nawaz Sharif veldig hardt då han vart skulda for korrupsjon, og det verkar som at dei hadde interesse i å få han ut av biletet, seier Skaufjord.

Han antyder at hæren var godt nøgde med undersøkande journalistikk då Nawaz Sharif vart avslørt i Panama-dokumenta, for ulovlege investeringar i utlandet.

– Men der verkar som at undersøkande journalistikk er problematisk for hæren når den er kritisk mot hæren, seier Skaufjord.