Brukte same bibelvers som Quisling

«Kvar og ein skal vera lydig mot dei styresmaktene han har over seg. For det finst inga styresmakt som ikkje er av Gud, og dei som finst, er innsette av Gud,» las ­justisministeren for ei forsamling av politifolk i USA før helga.

Quisling

Sist kapittel 13 i­ ­Romarbrevet vart brukt offentleg i norsk politikk, var det Quisling som argumenterte for å lyde ­
han.

– Quislingstyret viste til denne teksten for å seie at ein skulle bøye seg for ein kvar øvrigheit, men det er ikkje kristen plikt å lyde slike styre, seier Torleiv Austad, som er professor emeritus på Menighetsfakultetet.

Han viser til at Oslo-biskop ­Eivind Berggrav tok til motmæle mot Quislingstyret si tradisjonelle tolking av teksten, og brukte kapittel 3 i Romarbrevet til å vise at dette gjaldt rettsstatar - og ikkje kva som helst slags styresmakter. Berggrav si nytolking fekk stor betyding for luthersk etikk etter dette, ifølgje Austad.

Rett til motstand

– Ein kan difor ikkje seie at det er kristen plikt å bøye seg for makta – på generelt grunnlag, seier han.

Slik han ser det er det difor problematisk at USA sin nye praksis med å skilje born frå foreldre blir rettferdiggjort med denne skrifta.

– Luthersk etikk er på kollisjonskurs med dette utspelet frå justisministeren, for eg oppfattar at politikken krenkar ­menneskerettane, seier professoren.

Kritikk

Regjeringa i USA har fått mykje kritikk for den nye grensepolitikken dei introduserte i mai. Før helga argumenterte justisminister Jeff Sessions for den omstridde politikken.

– Eg vil lese for dykk apostelen Paulus og hans klare og kloke befaling i brevet til romarane, kapittel 13, sa Sessions frå talarstolen, før han las sitatet han no får endå meir kritikk for.

Professor Austad seier at bibelsitat berre har blitt brukt til politisk argumentasjon i krisetider, slik som under okkupasjonen. For i norsk politikk blir ikkje Bibelen brukt til argumentasjon.

Skummelt

– Det er skummelt å bruke bibelsitat for å legitimere partipolitiske standpunkt. Det er eit godt teikn at det ikkje er vanleg i norsk politikk. Vi veit kva kraft bibelsitat kan ha i enkelte personar sine liv, seier partileiar i Senterpartiet, Trygve Slagsvold Vedum.

Han trur likevel at ord og uttrykk frå Bibelen er godt innarbeidd i språket, og at ein difor ikkje unngår det.

– Vi bruker ikkje «vårt daglege brød» som argument i jordbruksoppgjeret, men heller som krydder. Når eg bruker bibelreferansar, vil eg at folk oppfattar det som krydder i språket mitt, og ikkje meir enn det, seier partileiaren.

Slaveri

Mange har reagert på at justisministeren brukte bibelvers til argumentasjon - og på teksten han valde å sitere frå. Den afrikanske metodistkyrkja i USA meiner Sessions argumenterer på same måte som dei som kjempa for slaveri på 1800-talet.

– Grunnleggarane av denne nasjonen tok skrifter frå ­Paulus til forsvar for slaveri, og for å bryte ned slavane, seier kyrkja i ei uttale på sine nettsider.

Dei meiner Sessions si tale var trist og syndig.

Paven på Twitter

Også Paven har meldt seg på med eit bibelvers. Vatikanet si avdeling for migrantar og flyktningar delte fredag ei uttale frå Pave Frans, som svar til Jeff Sessions. Paven siterer frå femte Mosebok.

«Bibelen lærer oss at Gud ‘gjer rett mot farlause og enkjer, og han elskar innflyttarane i landet, så han gjev dei mat og klede. De skal elska innflyttarane, for de var sjølve innflyttarar i Egypt,» skreiv dei på Twitter.