«Somme har teke frå meg både mi kristne tru og min legitimitet»

– Homofilt samliv er eit teologisk tema som rører ved og rammar enkeltmenneske. Det triggar meg til å spørje: Har vi sett og forstått alt? seier Terje Hegertun.

Teologiprofessoren ved MF vitenskapelig høyskole sit barbeint i si eiga stue. Heile livet har han vore aktiv i pinserørsla, blant anna som redaktør for hovudorganet Korsets Seier. Dei seinaste vekene har debatten gått høgt rundt den nye boka hans, Det trofaste samlivet, der han argumenterer for at det sentrale i eit samliv er den trufaste kjærleiken, og at trufaste homofile parforhold såleis ikkje er i strid med Bibelen.

Mange frydar seg over at det er «pinseprofessoren» Hegertun som kjem med desse teologiske vurderingane. Andre er skuffa.