Dette er en leder. Lederen gir uttrykk for Vårt Lands syn. Sjefredaktør og politisk redaktør har ansvar for innholdet.
Høgres alternative statsbudsjett er trist lesing for alle som er glade i den norske folkekyrkja. Der kuttar partiet 69 millionar i rammetilskotet og 30 millionar i tilskot til verna kyrkjebygg. Dei kuttar også 65 millionar i tilskot til trus- og livssynssamfunn.
Rett nok er kutta såkalla «nominell videreføring av tilskudd». Dette politikaruttrykket tyder at kronebeløpet ikkje vert endra frå førre år, sjølv om prisane elles i samfunnet går opp. Kvar krone vert med andre ord mindre verdt.
Det er dårleg nytt for kyrkja. Og ei elendig prioritering av eit parti med lang kyrkjeleg tradisjon.
Akutt prestemangel over heile landet
Politikarane må gjere tøffe prioriteringar. Spesielt i ei tid då renta går opp og ein ikkje lenger kan ause oljepengar ut over statsbudsjettet, slik Solberg gjorde då ho styrte landet saman med Venstre, KrF og Frp. Dei to sistnemnde partia er ikkje kjende for pengepolitisk nøysemd.
Men i tronge økonomiske tider er det ein ting ansvarlege politikarar vert målt på, nemleg evna til å prioritere. Og her sviktar Høgre.
Mange vender seg til kyrkja for støtte. Også høgrefolk som berre går i kyrkja i desember.
Det er ikkje lenger sjølvsagt at alle som ynskjer det, har ei gudsteneste å oppsøkje. I kyrkjesokn over heile landet, kanskje med unntak av storbyane, er prestemangelen akutt. Det kan neppe løysast med auka løyvingar åleine. Men kutt på 69 millionar i rammetilskotet vil utvilsamt gjere det enda vanskelegare å halde tilbodet oppe. Det er ei fattig trøyst at også dagens regjering kuttar i støtta til kyrkjebygg.
Problema som statsminister Jonas Gahr Støre strir med, overskuggar Høgres eigen politikk. Kanskje skal Høgre vere glade for det.
— Vårt Land
Kyrkja kan ikkje stole på at KrF reddar dei
Høgre flyr høgt på målingane for tida, og har henta over 110.000 veljarar frå Arbeidarpartiet. Problema som statsminister Jonas Gahr Støre strir med, overskuggar Høgres eigen politikk. Kanskje skal Høgre vere glade for det?
Målingane tyder på at Solberg kan komme tilbake til makta etter valet i 2025. Med eit KrF under sperregrensa og langt unna budsjettmakt, er det Høgre som har dei tradisjonelt sterkaste banda til kyrkja. Dette er partiet som inntil nyleg la inn kyrkjepause i sine landsmøte.
No sviktar dei eigne kristne veljarar, og er ikkje lenger ein garantist for ei sterk folkekyrkje.