Kultur i krisetid

Ein rapport som Telemarksforskning la fram på kulturkonferansen Kulturytring tysdag formiddag, viser at 44 prosent av norske kommunar har kutta i kulturbudsjetta sine i år. Det er «Kutt, kutt, kutt over hele linja», som rapporten heiter. Det går hardast ut over viktige tilbod som bibliotek, kulturskule og kunstformidling. Generalsekretær Monica Larsson i Norsk kulturforum kallar situasjonen for dramatisk. Det er vanskeleg å ikkje vere einig med henne.

Norske kommunar har fått dårleg råd. Over heile landet sveittar lokalpolitikarane for å få kommunebudsjetta til å gå opp, og det er få som prioriterer kulturskule framfor helsetenester og eldreomsorg.

På ein måte er det forståeleg. Samtidig viser dei omfattande kutta i dei kommunale kulturbudsjetta at politikarane har mangelfull forståing for det gode kulturen kan gjere for menneska.