Vi kan ikkje lenger ignorere energibehovet
Norge og Europa treng meir fornybar kraft. Då er det på tide at dei som står klare til å produsere energien, får løyve til å gjere det.
PARADOKS: Behovet for kraft har auka drastisk, samstundes som den fornybare utbygginga nesten har stoppa opp. Det er på tide for dei folkevalde å snu utviklinga, skriv Vårt Land på leiarplass.
Håkon Mosvold Larsen/NTB
Dette er ein leiar. Leiaren gir uttrykk for Vårt Lands syn. Sjefredaktør og politisk redaktør har ansvar for innhaldet.
Åslaug Haga, leiaren for Energi Norge, skildrar ei dramatisk utvikling: Dei siste åra har det vore ein dramatisk nedgong i talet på løyver til produksjon av fornybar energi i Norge. Det er eit paradoks då vi no står i ein situasjon med energimangel i Europa og Norge.
Påstanden frå interesseorganisasjonen vert understøtta av tal frå NVE. Eit talande eksempel er at det i 3. kvartal i 2013 vart gitt 98 nye konsesjonar til utbygging av fornybar energi i form av vasskraft og vindkraft, medan det i 3. kvartal i 2022 berre vart gitt 8. Grafen er ikkje lystig lesnad for kundane med høge straumrekningar, eller for dei som har ansvar for å sikre straumforsyning til folk og land.
