Viser vegen i Norge
FERIE: Norgesferien står for døra. Mange søkjer dei unike opplevingane, gjerne utanfor alfarveg. Tre bøker viser veg.
STEIGEN: Alle må ikkje til Lofoten, prøv Steigen, seier Gunnar Garfors. Her frå Brennviksanden.
Kyrre Lien
Utlandet opnar opp for feriehungrige nordmenn. Men også i sommar blir det «Norge – mitt ferieland» for svært mange.
Det skal du vere glad for, meiner globetrottaren Gunnar Garfors. Mannen som har vitja alle land på kloden, to gonger, meiner alt for mange nordmenn reiser alt for langt for dei store opplevingane.
Fordi utlandet var pandemistengt i fjor og første halvår i år, har Garfors reist på oppdagarferd i eige land, og spora opp dei mest unike og undervurderte stadane i Norge. Stadar som ikkje alltid ligg veldig langt utanfor europavegane, men der mange av oss susar rett forbi på veg til meir populære reisemål.
