Tilbake til snøen som falt

Med årets Lyset de døde ser, ei fartsfylt bok om minner og sorg, vender Levi Henriksen tilbake til der han starta som romanforfattar. No står Daniel Kaspersen, hovudkarakteren frå den første romanen hans, ved dødsleiet til Mona. Dei vaksne barna Sebastian og Jakobine er også der.

Ihuga Levi Henriksen-lesarar, og dei er det mange av, kjenner igjen fleire av desse folka frå Henriksens strålande debut-roman frå 2004, Snø vil falle over snø som har falt. Då hadde Daniel nettopp kome ut frå fengsel etter ein narkotikadom og sørga over bror sin, Jakob, som tilsynelatande hadde tatt livet sitt. 

I arbeidet med å finne ut kva som skjedde med Jakob, fekk Daniel god hjelp av den stødige heidersmannen Markus Grude som er lensmann på staden.