Nei til sentralstyrt kyrkjekonsern
ORGANISERING: Her kjem ein appell til kyrkjeråd og kyrkjemøte frå dei som har skoa på: Me ønskjer ikkje eit sentraltstyrt kyrkjekonsern!
LOKAL KYRKJE: «Sokna er ikkje små underavdelingar i konsernet Den norske kyrkja. Sokna er sjølvstendige rettssubjekt», skriv rådsleiarar i Bjørgvin bispedømme. Dei er bekymra for ei sentralisering av Den norske kyrkja.
Illustrasjonsbilde: Kirkerådet
Vår tilnærming til organiseringa av kyrkja, til liks med det store fleirtalet av høyringsinstansane, er at me ønskjer ei arbeidsgjevarlinje i kyrkja. Spørsmålet blir dermed, i si enklaste form, om prestane skal flyttast til fellesråda som arbeidsgjevarar eller om alle dei andre skal flyttast til kyrkja sentralt.
Ei luthersk folkekyrkje tek utgangspunkt i det allmenne prestedømmet, i kyrkjelyden, i soknet. Det er difor ikkje utan grunn at soknet i tiår har vore sjølvstendige rettssubjekt og at fellesråda har vore arbeidsgjevarar for dei aller fleste kyrkjeleg tilsette, på sokna sine vegne.
Etter at det no har vakse fram eit sterkt og velbegrunna ønskje om å samla alle kyrkjeleg tilsette hos ein arbeidsgjevar, blir det frå nokre hevda at det er betre å flytta alle dei andre tilsette frå fellesrådet til den sentrale arbeidsgjevaren, enn å la også prestane få den lokale arbeidsgjevaren.
