Nyheter

Amnesty: Norge kan vere medskuldig i tortur

– Etterforsking må til.

Dei vart haldne vakne i 180 timar i strekk. Lenka fast i taket. Mata gjennom endetarmen. Utset for «liksom-avrettingar» med drillar, med bind for auga. Ein fraus i hel, lenka til eit kaldt steingolv. Eit samandrag av ein rapport om USAs torturmetodar mot terrormistenkte fangar etter 11. september 2001, blei presentert førre veke. Det har vakt sterke reaksjonar.

Ingen stilt til ansvar

«Verda har lenge visst at amerikanske myndigheiter på ulovleg vis arresterte og torturerte fangar, og laug om det til Kongressen. Men samandraget av denne rapporten, sjølv etter at CIA har gått gjennom den, viser ei forderving som er vanskeleg å forstå og som er endå vanskelegare å tåle», skreiv The New York Times på leiarplass.

Spørsmålet mange har stilt seg er: Kvifor blir ingen stilt til ansvar? Verken dei som bestemte at tortur skulle brukast, dei som utførte avhøra, eller dei som dekte over det i etterkant (til dømes ved å øydelegge videoopptak) har blitt etterforska.

LES OGSÅ: Oljefondet tener på dronedrap

Fly landa i Noreg

Rapporten viser også at fleire europeiske land var involvert i CIA sitt bortførings- og avhørsprogram. Dette gjeld spesielt Storbritannia, Polen, Litauen og Romania.

Men også Norge kan ha spela ei rolle. Frå 2003 til 2007 mellomlanda nærare 20 CIA-fly på norske flyplassar. Dette var ofte private fly som var leigd inn av CIA, og det var heilt tilfeldig at dei blei oppdaga, ifølgje Gerald Folkvord i Amnesty. Ein som følgde saka tett over fleire år var journalist Jan-Petter Helgesen i Stavanger Aftenblad.

– På Sola flyplass åleine var det 16 slike fly som landa i denne tidsperioden. Det var også CIA-fly på Flesland i 2003, Værnes og 1-2 på Gardermoen, seier Helgesen til Vårt Land.

Det er framleis uvisst om desse flya hadde fangar om bord då dei landa i Noreg. Men Helgesen tvilar ikkje.

– Det er høgst sannsynleg at det var fangar om bord. CIA ville ikkje flydd her i dette luftrommet berre for å gjere det.

LES OGSÅ: – Tortur forekommer i over 140 land

– Plikt til å undersøke

Mange av CIA-flya som mellomlanda i Norge, var på veg til USA. Dei kom frå Polen, Litauen og Afghanistan, land der CIA hold terrormistenkte fanga. Polen vart tidlegare i år dømt i den europeiske menneskerettsdomstolen for medverknad til tortur av Abu Zubaydah og Abd Al Rahim Al Nashiri. Førstnemnde vart utsett for simulert drukning 83 gongar. I dag sit Zubaydah framleis på Guantanamo. Amnesty har gang på gang oppfordra norske myndigheiter til å etterforske Noregs rolle.

– Vi veit at fly som har vore involvert i illegal fangetransport har landa i Norge. Det var god grunn til å mistenke at desse flya var innblanda i alvorlege forbrytingar, og norske myndigheiter hadde både rett og plikt til å gå om bord og undersøke dette, meiner Folkvord, som er organisasjonens politiske rådgjevar.

Men, so vidt Amnesty veit, har ei gransking aldri skjedd.

– Det einaste svaret vi fekk var at norske myndigheiter har venda seg til den amerikanske ambassaden, som sjølvsagt avviser at dei krenkar norsk suverenitet, seier Folkvord.

Han meiner det gjer oss medskuldige om vi ikkje etterforskar dette.

– Det er inga orsaking å seie at dette er USA eller Litauen si sak – at vi ikkje er involvert. Dersom norske tenestemenn visste om at dette skjedde, så har dei brote både norsk og internasjonal straffelov.

LES OGSÅ: USA vervar krigspilotar på guterom

– Dyssa det ned

I 2006 kom ein rapport frå Europarådet, der dåverande generalsekretær Terry Davis refsa Europas regjeringar for å gjere lite for å hindre at framande, hemmelege tenester i å bryte menneskerettane. Ifølgje journalist Helgesen gjorde norske myndigheiter sitt beste for å dysse ned at CIA-fly landa i Norge. Han viser til at granskingar blei starta i andre europeiske land, som Danmark og Tyskland. Men ikkje i Norge.

– Det er lite sannsynlig at mellomlandingane kunne skje utan at norske myndigheiter visste om det, meiner Helgesen.

Ifølgje Amnesty er ei etterforsking viktig for meir enn berre å stille nokon til ansvar.

– Det er bekymringsverdig at vi ikkje har sett steg mot å forhindre at slikt kan skje igjen, seier Folkvord.

LES OGSÅ: Dreper uskyldige

Reagerer på rapport

Utanriksminister Børge Brende reagerte førre veke sterkt på den nye rapporten.

– Dett er svært klanderverdig. Vi må ikkje gløyme at det er totalforbod mot tortur, sa han til NTB.

Samtidig ga han amerikanarane ros for å ha tatt tak i saka.

– President Obama går ut og seier at dette burde aldri ha skjedd, og det vil ikkje skje i framtida. Det seier mykje om det amerikanske samfunnet og bidreg til at USA framleis med legitimitet kan påtale menneskerettsbrot både heime og ute i verda, meiner Brende.

Les mer om mer disse temaene:

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Nyheter