Veiteberg heime att frå Palestinatur: – Me sviktar fordi ein tenkjer at ein skal velje side
DEN NORSKE KYRKJA: Den ferske Palestina-turen til biskop Kari Veiteberg gjorde sterke inntrykk. – Me treng ikkje å skjøne meir. Me har sett nok.
I RUINAR: Kari Veiteberg fortel at ho møtte mannen Fakhari Abu Diab som budde i huset i Aust-Jerusalem som no berre er ruinar. – Busetjarar overtek hus og leilighetar i det store palestinske nabolaget Silwan, og markerer det ved å henge opp israelske flagg på utsida, seier Veiteberg.
Jannik Abel
Biskopen viser veg inn til eit stort møterom i bispegarden i Oslo sentrum. Frå taket heng ei imponerande ljosekrone.
Kari Veiteberg kom heim frå reise rundt i Palestina for to døgn sidan, og framleis pregar inntrykka henne sterkt. I fjor budde ho i ein månad i Betlehem, og forskjellen til det som møtte ho denne gongen var stor.
– Det er ei fortviling eg ikkje har møtt før. Det som gjorde størst inntrykk var drosjesjåføren, ungdommane og prestane som seier at «no ser me ikkje håpet lengre».
