For 2024 har Normisjon eit mål om å få samla inn 37 millionar kroner i gåver. Ved utgangen av november var det berre komme inn 27 millionar kroner. Dermed gjenstår 10 millionar.
Det opplyser Normisjon til Vårt Land.
– Ut frå tidlegare erfaringar veit me at mykje av gåveinntektene kjem mot slutten av året. Akkurat no er eg spent på om me når ramma me har sett oss for i år, seier Eivind Milton Saaghus, økonomi- og administrasjonssjef i Normisjon, i ei pressemelding.
Mange kjenner på auka utgifter og usikkerheit – det gjer me i Normisjon også.
— Eivind Milton Saaghus, Normisjon
Saaghus seier dagens situasjon er utfordrande, og peiker på dyrtid og eit krevjande verdsbilde i Europa.
– Mange kjenner på auka utgifter og usikkerheit – det gjer me i Normisjon også. Dagens situasjon utfordrar oss, men me ser samstundes kor viktig arbeidet vårt er.
Nivået på gåveinntekter har gått nedover i mange år, skriv Normisjon i pressemeldinga. For ti år sidan var inntektene på 50 millionar kroner i året. I fjor var talet rett under 40 millionar kroner. Det heng saman med ein nedgang i tal på givarar.
