Oslo bispedømeråd hadde møte måndag kveld, der dei skulle koma med sitt ynskje til kven som skal bli Oslo-biskop.
Det er Kyrkjerådet som skal ta den endelege avgjersla om kven det blir.
Øvst på ynskjelista har dei sett professor ved MF vitenskapelig høyskole Sturla Stålsett (60).
På andreplass har dei Sunniva Gylver (57), sokneprest i Fagerborg kyrkjelyd, og på tredjeplass er Ingeborg Sommer (51) som er prost i Bærum.
---
Bispenominasjon i Den norske kyrkja
- Alle kan føreslå kandidatar til ny biskop.
- Bispedømerådet nominerer opptil fem eigna kandidatar.
- Kyrkjerådet gjev ein frist for å stille supplerande kandidatar til bispedømerådet sin nominasjon.
- Dei nominerte kandidatane blir presenterte.
- Alle røysteføre røyster.
- Dei tre kandidatane med flest røyster vert offentleggjorde.
- Biskopar og bispedømeråd uttalar seg.
- Kyrkjerådet tilset ny biskop.
---
På bølgjelengde
Det er berre få dagar sidan førre utvikling i bispenominasjonen skjedde. Då var resultata av den såkalla rådgjevande avstemminga blei klar.
Her kunne mange i Oslo bispedøme seie si meining, mellom anna sokneråda, dei vigsla tilsette og ungdomsrådet. I hadde alle prostar i heile landet og representantar frå fleire praktisk-teologiske utdanningsinstitusjonar høve til å stemme.
Til saman kom det inn stemmer frå 254 ulike instansar og tilsette, og resultatet er heilt i tråd med det bispedømerådet no har lagt fram: Stålsett øvst, så Gylver, deretter Sommer. Resultatet av avstemminga førte til at kandidatane Espen Andreas Hasle og Stephanie Dietrich, ikkje kom med vidare.
Neste steg på vegen til ny biskop skjer 11. november, då dei noverande biskopane i Den norske kyrkja skal gjera kjent kven dei helst ser at tek over bispesetet i Oslo domkyrkje.
5. desember har Kyrkjerådet møte, der dei skal ta den endelege avgjersla om kven av dei tre kandidatane som blir ny biskop.
