Religion

Teolog om biskopens nye syn: – Likekjønna samliv ikkje lenger eit like viktig spørsmål

HOMOFILI: Det vekte merksemd då Møre-biskop Ingeborg Midttømme uttalte at ho har snudd i spørsmålet om likekjønna samliv. – Ein gjev kanskje spørsmålet om likekjønna samliv uforholdsmessig stor plass, meiner dekan ved Det teologiske fakultetet.

Biskop i Møre, Ingeborg Midttømme, har vore ein del av mindretalet av biskopane som har meint at det ikkje er eit bibelsk grunnlag fot å vie par av same kjønn.

Nyleg blei det klart at ho har snudd i spørsmålet. På spørsmål om når det skjedde, sa ho til Vårt Land at det har skjedd i etterkant av samlivsvedtaket som opna for likekjønna vigsel i Den norske kyrkja (DNK) i 2016.

– Eg aksepterer at eit ekteskap er eit ekteskap. Det går ikkje an å setje ein dato. Det er store spørsmål, da må ting få ta tid. Det er lov å bli eldre og sjå eit større bilete, sa biskopen.

I vår tid er det i spørsmål om samliv, ekteskap og kjønn at det brenn aller mest. Og då er det også i denne tematikken at me blir utfordra mest på å vera tru mot evangeliet.

—  Sverre Elgvin Lied, leiar av Frimodig kirke

– Enormt press

Også i forbindelse med at jakta på arvtakaren til Bjørgvin-biskop Halvor Nordhaug er i gang, har det blitt aktualisert kva ein ser etter i ein biskop.

Sverre Elgvin Lied er sokneprest i Lyngdal og leiar av den kyrkjepolitiske lista Frimodig kyrkje. Han sa til Vårt Land i den forbindelse at det vil bli tøffare for dei få biskopane som «som fastheld ei tradisjonell bibelsk lære, særleg i forhold til samliv og ekteskap», dersom Nordhaug blir erstatta med ein liberal biskop. Det same seier han om at Midttømme har endra syn.

– Presset i både samfunn og kyrkje er heilt enormt på dette feltet for tida. Snuoperasjonen til Midttømme er eit teikn på at ein merkar dette konformitetspresset også i bispekollegiet, meiner Lied.

Det er viktig med mangfald blant biskopane, også teologisk, men kanskje gjev ein spørsmålet om likekjønna samliv uforholdsmessig stor plass.

—  Aud Valborg Tønnessen, Dekan ved Det teologiske fakultetet, UiO

– Open folkekyrkje gjer det godt i kyrkjeval. Er ikkje liberale biskopar slik sett noko fleirtalet i kyrkja ynskjer seg?

Lied innleiar med å seie at kyrkja skal forvalte ein skatt, nemleg evangeliet om Jesus.

– Det er ikkje opp til oss å tilpasse og endre på dette i tråd med ideologiske strøymingar i tida. Andre tider hadde andre problemstillingar der det brann. I vår tid er det i spørsmål om samliv, ekteskap og kjønn at det brenn aller mest. Og då er det også i denne tematikken at me blir utfordra mest på å vera tru mot evangeliet.

Stiftelsesmøte for Frimodig kirke UNG, en kirkepolitisk ungdomsorganisasjon.

Han meiner Kyrkjerådet og andre som har med tilsetjing av biskopar å gjera bør tenkje over om ein kan hamne i ein situasjon der dei som held fast på ei meir tradisjonell lære blir så marginaliserte at dei i realiteten blir pressa ut av DNK.

Symbolspørsmål

Men ikkje alle er einige i at det er samliv som er det mest presserande spørsmålet ein kan måle biskopar på.

Dekan ved Det teologiske fakultetet, Aud Valborg Tønnessen, er ikkje særskilt uroa over at ein kan ende opp med eit bispekollegium med ingen eller få med eit konservativt syn på likekjønna samliv.

– Det er viktig med mangfald blant biskopane, også teologisk, men kanskje gjev ein spørsmålet om likekjønna samliv uforholdsmessig stor plass. Det blir eit symbolspørsmål, seier Tønnessen.

Ho meiner det er minst like viktig å ha eit mangfald blant biskopane i andre teologiske spørsmål. Ho trekkjer mellom anna fram debatten kring korleis ein skal vera folkekyrkje, eller kva slags kyrkje DNK skal vera.

– Mykje av utfordringane i dag med rekruttering og resursar i DNK handlar om å vera ei landsdekkjande folkekyrkje. Ein treng veldig kompetente biskopar til å ta tak i dei spørsmåla.

Mobiliserer ikkje like mykje

Tønnessen hadde ikkje fått med seg at Midttømme har endra meining i spørsmålet kring likekjønna ekteskap. Det synest ho er svært interessant.

– Seier dette noko om utviklinga i Den norske kyrkja? Er spørsmålet kring likekjønna samliv ferd med å bli eit mindre viktig?

– Ja, det trur eg faktisk. Det har vore ei utvikling over tid. Fram mot vedtaket der ein opna for likekjønna vigsel førte spørsmålet til ei verkeleg mobilisering kring kyrkjeval. No har ein landa, og det er ikkje eit mobiliserande tema på den måten lenger.

Tønnesen fortel at det er ulike spørsmål som har vore avgjerande i tidlegare bispeval. I 1932 blei målsaka ganske avgjerande for at Andreas Fleischer blei ny biskop. Ein ville altså ha ein biskop som skreiv nynorsk, fortel Tønnessen.

– Risikerer at andre saker forsvinn

Gard Sandaker Nielsen i Open folkekyrkje, seier det er viktig for organisasjonen han leier at ein har teologisk mangfald i bispekollegiet.

– Det er viktig at ein har biskopar som representerer dei ulike hovudstrøymingane i kyrkja. Men det kan ikkje avgrensast til synet på likekjønna samliv. Viss me berre er opptekne av dette temaet er det andre saker og perspektiv som forsvinn.

Gard Sandaker-Nielsen. Leder av Åpen folkekirke.

– Synet på likekjønna ekteskap heng ofte saman med eit meir konservativt syn også på andre område. Er det ikkje viktig at personar også med desse synspunkta kjenner seg representerte?

Det er ein diskusjon som har levd i kyrkja i lang tid og som har definert mykje. Framover håpar eg ikkje denne diskusjonen blir like definerande for kyrkja. Me treng biskopar som kan leie kyrkja, byggje bruer, peike på Jesus og engasjere til tru og samfunnsengasjement.



Les mer om mer disse temaene:

Marit Mjølsneset

Marit Mjølsneset

Marit Mjølsneset er journalist i religionsavdelingen i Vårt Land.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Religion