I går kom gladmeldinga til det frivillige Norge om at lag og foreiningar får ei eiga straum-støtteordning. Kulturminister Anette Trettebergstuen (Ap) sa at regjeringa ville dekke delar av utgiftene til frivillige organisasjonar og idrettslag.
Men om den nye støtteordninga omfatta trus- og livssynssamfunn var uklart, noko Norges Kristne Råd stilte spørsmål om.
Først stadfesta Barne- og familiedepartementet at denne ikkje omfatta trus- og livssynssamfunn.
Onsdag kom kontrabeskjeden: Jo, mange trussamfunn er omfatta av denne ordninga likevel – dei som er registrert i Frivillighetsregisteret.
Kommunikasjonsavdelinga i departementet beklagar feilkommunikasjonen, og presiserer at kyrkjebygg eigd av sokn i Den norske kyrkja (DNK) ikkje er omfatta av eventuelle straumstøtteordningar som gjeld frivillige organisasjonar.
Må finne midlane lokalt
Statsråd Kjersti Toppe (Sp) understrekar at kommunane har fått ein auke i frie midlar, og har eit ansvar for å følge opp også kyrkjene. Ho vil følge med på utviklinga i saka.
Som trus- og livssynsministeren sa til Vårt Land i førre veke, står ho framleis for at det er «svært uheldig» om ein kjem dit at kommunane ser seg nøydde til å stenge kyrkjer og avlyse gudstenester og liknande, på grunn av kostnadane til straum og oppvarming.
– Kyrkjene er av mange grunner ekstra viktige å halde opne no i pandemitida, fordi behovet for å samlast er stort etter ganske sterke restriksjonar i jule- og nyttårshøgtida, seier Toppe.
– Kyrkjer er ikkje eit kva som helst forsamlingslokale. Det er grunnleggande viktig for folk å kunne samlast for å praktisere trua si saman med andre og vere i kyrkja.
For å finne ei løysing må ein i første omgang finne midlar lokalt, seier Toppe.
– Kommunane har fått ei stor auke i frie midlar, og eg håpar dei kan finne gode løysingar for kyrkjer over heile landet slik at kyrkjeleg aktivitet i denne pandemitida ikkje blir skadelidande av høge straumprisar, seier ministeren.
[ Etterlyser svar på om straumstøtte til organisasjonar òg gjeld for trussamfunn ]
Ropstad: – Uforståeleg at DNK ikkje er inkludert
Sjølv om det er gledeleg med støtte til trus- og livssynssamfunn, reagerer KrF-stortingspolitikar Kjell Ingolf Ropstad.
– Det er heilt uforståeleg at regjeringa har prester tå lage ein straumpakke som ikkje inkluderer det største trussamfunnet i landet, sier Ropstad til NTB.
Han viser til at kyrkjene har levd under strenge restriksjonar, og at ein burde legge til rette for at kyrkjene kan «stå klar med opne armar».
– Det er rett og slett tragisk dersom straumprisane skal vere det som hindrar truande frå å samlast.
Ropstad viser til at KrF har tatt til orde for makspris på straum på 50 øre per kWt, frå januar til mars, som skal gjelde for alle straumkundar.
