Dei over 100 folkevalde i Den norske kyrkja (DNK) kjem saman til Kyrkjemøtet kvar april. Der blir nokre av dei viktigaste avgjerdene i Kyrkje-Norge tatt.
Då dei nyvalde representantane møttest til Kyrkjemøtet i oktober, var det under strenge smitteverntiltak. Det var ikkje høve til å møtast i komitear for å diskutere.
Ønsket om å få haldt eit så normalt møte som mogleg, gjorde at 2021-møtet blei utsett frå april.
I år blir Kyrkjemøtet 11. til 16. november, tradisjonen tru i Trondheim.
[ Kirkemøtet? Kirkerådet? Bispemøtet? Her kirkedemokratiet for «dummies» ]
– Håpet har gått på ein smell
Med strenge tiltak blei det eit koronafritt Kyrkjemøte i haust. No håpar leiaren for Kyrkjerådet at 2021-møtet kan bli litt friare.
– Håpet har jo gått på ein smell ei rekke gonger i løpet av pandemien. Men eg håpar fortsatt at me kan gjennomføre neste Kyrkjemøte nesten som me pleier, seier Kristin Gunleiksrud Raaum.
– Me skal få til godt smittevern i år òg, og sjølvsagt gjennomføre i tråd med reglane som gjeld i november.
Avgjerda om å utsetje møtet frå vår til haust var ikkje enkel, fortel kyrkjerådsleiaren. Likevel trur ho avgjerda var riktig. På fjorårets møte fekk ikkje delegatane møtast for å diskutere sakene i mindre grupper. Slike restriksjonar gjer noko med behandlinga, meiner Raaum.
– Det å få bruke ordentleg tid på sakene, snakke saman i pausane og ikkje minst ha komitear, er så viktig for ei god, demokratisk og åpen gjennomgang av sakene, seier ho.
---
Kyrkjemøtet
- Den norske kyrkja sitt øvste organ – ofte kalla kyrkjas «Storting». Har 116 medlemmer.
- Kvart år samlest representantane i dei 11 bispedømmeråda til Kyrkjemøtet. I år blir det arrangert 11.-16. november i Trondheim.
- Kyrkjemøtet skal mellom anna uttale seg om viktige lovendringar, og setje planar for mellom anna undervisning, diakoni, økumenisk verksemd og kyrkjemusikk.
---
– Utan den inngåande drøftinga, blir ikkje sakene behandla like godt, rett og slett. Då me i mars hadde ny dato oppe i Kyrkjerådet, var utsiktene for komitearbeid heilt avgjerande. Me kan ikke ha rammer for Kyrkjemøtet som gjer at sakene ikkje blir godt nok, eller åpent nok, belyst.
Dette blir viktige saker
Utkastet til årets saksliste er allereie klart. Kva blir dei viktigaste sakene? blir Raaum spurt.
– Alle er sjølvsagt viktige, seier ho, før ho held fram på lista:
Kulturarv-strategi. Konfirmasjonstidas gudstenester. Klima. Globale oppdrag. Rekrutteringsstrategi. Reglar for kyrkjevalet. Strategiplan. For å nevne nokre.
– Ein del av sakene treng me å bruke tid på, og snakke ordentleg om i åpne rom. Det har eg trua på at me får gjere i år, seier kyrkjerådsleiaren.
[ – Vi trenger et effektivt byråkrati, dersom kirken skal nå bredt ut med evangeliet ]