Kristen massedrapsmann ville fjerne freistingar

Pizza, våpen, trommer, musikk, familie og Gud. Slik oppsummerte 21 år gamle Robert Aaron Long livet sitt på Instagram. «Det er eit ganske godt liv», konkluderte han.

Denne veka øydela Long sitt gode liv ved å ta livet av åtte menneske. Han køyrde frå massasjesalong til massasjesalong i den amerikanske delstaten Georgia og drepte personar han oppfatta som seksuelle freistingar. Politiet pågreip han etter ei biljakt der Long skal ha vore på veg til Florida for å angripe pornoindustrien. Han skal til politiet ha fortalt at han var sexavhengig og at han ville eliminere det som freista han.

– Han var ein superhyggeleg, superkristen og stille fyr, seier Nico Straughan, som gjekk på skule saman med massedrapsmannen, til Associated Press.

Straughan fortel at Long brukte å ha med seg Bibelen til skulen kvar dag.

– Han gjekk frå å vere ein av dei greiaste eg kjente på high school, til å hamne i nyhenda.

---

Massedrapet i USA

• Denne veka blei åtte personar drepne ved tre ulike massasjesalongar i den amerikanske delstaten Georgia. Seks av dei åtte drepne var av asiatisk opphav. Sju av dei var kvinner.
• 21 år gamle Robert Aaron Long er pågripen og sikta for drapa.
• Long har bakgrunn frå baptistkyrkja Crabapple First Baptist Church, der han og familien har vore aktive medlemmar i mange år.

---

Aktiv i kyrkja

Long har gjennom oppveksten vore aktiv i den lokale baptistkyrkja, Crabapple First Baptist Church, saman med faren, mora og ei yngre søster. Faren var ein viktig leiarfigur i kyrkjelyden, og mora arrangerte filmkveldar. Her blei Aaron, som han kalla seg, døypt som åtteåring, her stabla han stolar og vaska golv i tenåra, og her deltok han på gudstenester og andre samlingar. Han hjelpte også til med songar og leikar for barn.

Han døypte seg om att for tre år sidan, og kom då med eit kristent vitnesbyrd som blei lagt ut på video på kyrkjelyden sine heimesider. Ifølgje The Christian Post sa han i videoen at den første dåpen hans ikkje hadde bore frukter:

– Som åtteåring trudde eg at eg var i ferd med å bli kristen. Eg døypte meg, og mykje av grunnen var at mange andre frå søndagsskulen også gjorde det. Men fruktene frå frelsesrøtene uteblei.

Long refererte til bibelforteljinga om den bortkomne sonen, og meinte han blei frelst først mange år seinare, då han forstod at Gud ønskte å ta imot han etter at han hadde stukke av og levd «berre for seg sjølv».

– Det var då eg blei frelst, sa han, ifølgje The Christian Post.

Sjokkert ungdomsleiar

I 2018 var Long også ein av elleve ungdommar i eit team som dreiv med studentevangelisering. Målet til Long og gruppa hans var å få studentar til å «ta imot Jesus Kristus som Herre, vandre med han og vere rotfesta i trua».

– Eg kjenner ikkje til noko i Crabapple som kunne leie fram til skytinga. Eg reknar meg at kyrkjelyden er like sjokkerte som meg, seier tidlegare ungdomsleiar Brett Cottrell til The Washington Post.

– Vi er leie oss for å høyre dei tragiske nyhenda og hjartet vårt er knust for alle dei involverte. Vi sørger over offera og familiane deira og vi vil halde fram med å be for dei. Vi er i tillegg fortvila for Long-familien og vil be også for dei, seier Jerry Dockery, den leiande eldste i kyrkjelyden, i ei pressemelding.

Familien bistod politiet i å få tak i drapsmannen ved å spore han gjennom mobiltelefonen.

Auka vald mot asiatar

I USA er det mange som har sett massedrapet i samanheng med aukande mistru til og vald mot asiatar i kjølvatnet av koronaviruset. Denne veka døydde også ein 84 år gammal thailandsk mann i San Franscisco etter å ha blitt dytta overende mens hans var ute på sin sedvanlege morgontur. Seks av dei åtte drepne i Georgia var av asiatisk opphav.

– Vi kjenner ikkje motivet enno, men vi veit at det asiatisk-amerikanske samfunnet kjenner på stor smerte i kveld. Dei nylege angrepa er uamerikanske og må stoppe, skreiv president Joe Biden på Twitter etter massedrapet.

Det lokale politiet har så langt hevda at Longs motiv ikkje var rasistisk, men at det sprang ut av ønsket om å slå til mot kjelder til seksuelle freistingar. Blant anna skal Long ha hatt personlege vanskar med porno. Politiets utsegner er allereie blitt møtt med mykje kritikk frå dei som meiner at drapa var rasistisk motiverte.

Politiet har ikke stadfesta at massasjesalongene selde sex. Det er også usikkert om Long har vore der før han gjekk til angrep med skytevåpen, men politiet har uttalt at dei trur han har frekventert stadene tidlegare. Ifølgje NTB skal det også vere fleire strippeklubbar i området der angrepa fann stad.

Angrepa i Georgia er den sjette massedrapshendinga i USA hittil i år. Kristne leiarar over heile USA har fordømt angrepa, og oppmodar til meir arbeid mot sexisme og rasisme i amerikanske kyrkjer.

Kjelder: AP, Washington Post, New York Post, The Christian Post, The Daily Beast, Religion News Service, NTB