Anmeldelser

Haltande trav for Jakten på Berlusconi

FILMMELDING: Verken Morten Ramm eller Atle Antonsen kan redde denne filmen.

Ein komedie frå travmiljøet høyrest i utgangspunktet ut som ein god idé. Jakten på Berlusconi handlar om ein travkusk som skuldar pengar, to etterforskarar frå Økokrim og ei handfull store og små kriminelle. Med framståande komikarar som Morten Ramm og Atle Antonsen på rollelista skulle ein kanskje tru at filmen kunne bli eit minstemål av morosam. Men verken Ramm eller Antonsen kan redde denne filmen. I staden fislar Jakten på Berlusconi ut i eit knippe halvgode sketsjar og påfunn.

LES OGSÅ: Disneys ondskap

Ujamnt

Regissør Ole Endresen stod også bak Kong Curling (2011), som bar preg av det same ujamne manusarbeidet. Eit par lattervekkande scener og replikkar får vi også denne gongen, som når den mafiaboss-aktige Malte Sandmann (Bjørn Floberg) får travkusken Bjarte Lem (Edward Schultheiss) på kontordøra og bryt av ein telefonsamtale med å seie at han «har fått småfolk på besøk».

Valdeleg

Filmen har 11-årsgrense, men er i overkant valdeleg på Quentin Tarantino-vis. Inspirasjonen frå Tarantino kan sporast i alt frå overraskande skotscener til bilar og musikk. Dessverre er Jakten på Berlusconi milevidt unna coolness-en til regissøren som blant anna gav oss Pulp Fiction. Dermed blir det noko keitete over filmen, som først og fremst står fram som umodent kjekkaseri.

LES OGSÅ: Religion på litterært alvor

Slitsamt

Nokre plussfaktorar finst her rett nok: Henriette Steenstrup og Morten Ramm funkar brukbart som parhestar i Økokrim, og Bjørn Floberg er strålande i si sleipe skurkerolle. Det er likevel ikkje til å komme ifrå at denne bongen, iallfall kunstnarisk sett, ikkje gjekk inn. Haltande trav er slitsamt på kino. Og særleg slitsamt i ein komedie.

Les mer om mer disse temaene:

Alf Kjetil Walgermo

Alf Kjetil Walgermo

Alf Kjetil Walgermo er journalist og litteraturkritikar i Vårt Land. Han er tidlegare kulturredaktør i avisa. Walgermo er også forfattar.

Vårt Land anbefaler

1

1

1

Annonse
Annonse

Les dagens papirutgave

e-avisen

Mer fra: Anmeldelser