USA har hevda at eit russisk skip tok om bord ei last med våpen frå ei sørafrikansk hamn seint i fjor.
– Ingen av påstandane som er sett fram om leveransar av våpen til Russland, har vist seg å vere sanne. Ingen eksportløyve for våpen vart gitt, og ingen våpen vart leverte, sa Ramaphosa i ein fjernsynstale søndag der han presenterte resultatet av granskinga.
USAs ambassadør til Sør-Afrika, Reuben Brigety, påpeika overfor ei gruppe journalistar i mai i år at det russiske lasteskipet Lady R hadde teke om bord våpen ved ein marinebase i nærleiken av Cape Town i desember 2022.
Påstanden utløyste ein diplomatisk feide mellom dei to land. Dei amerikanske påstandane førte til spørsmål om Sør-Afrika verkeleg er eit alliansefritt land og om det har innteke ei nøytral haldning til krigen i Ukraina.
Sørafrikanske tenestemenn var raskt ute med ei full avvising av påstandane, og Ramaphosa nedsette ein uavhengig granskingskommisjon leidd av ein pensjonert dommar.