Tenner lys for Gud og menneskerettar
Konfirmasjonsundervisninga i kyrkja liknar meir og meir på opplegga til Human-Etisk Forbund, meiner forskarar, og tek til orde for samarbeid. I Åmot er samarbeidet allereie eit faktum.
– Eg trur ein lærer mykje om verdiar i både kyrkjeleg og humanistisk konfirmasjon, sjølv om den eine typen er med religion og den andre utan, seier Celine Aletta Flinterud.
14-åringen skal konfirmerast til hausten. Denne kvelden, ein søndag, deltek ho og fleire andre konfirmantar på kveldsgudstenesta i Oppsal kyrkje. Det er kanskje 50 menneske til stades, dei aller fleste konfirmantar. Før gudstenesta er det kafé, med småkaker og saft.
Flinterud og dei andre ungdomane må delta på åtte gudstenester i konfirmasjonstida. I tillegg må dei møte opp til undervisning annankvar onsdag, totalt seks gongar.
