Setesdalskulturen blir verdsarv

Torsdag ettermiddag blei søknaden frå Setesdal spelemannslag om å få Setesdals-kulturen inn på UNESCOs verdsarvliste klubba igjennom.

Folkedans, stev og musikk blir dermed såkalla immateriell kulturarv. UNESCO er FNs organisasjon for utdanning, vitenskap, kultur og kommunikasjon.

Leiar i Setesdal spelemannslag, Astri Rysstad, jublar:

- Heilt fantastisk. Me er veldig glade og stolte no, seier ho til Setesdølen.

Delegasjon jublar

Ho er på UNESCOs konferanse i Bogota i Colombia saman med ein delegasjon frå spelemannslaget samt fylkesordførar i Aust-Agder, Gro Bråten.

- Dette viser kva kulturarven i Setesdal er, og det seier mykje om det solide arbeidet som er gjort, seier Bråten.

«Betyr uendeleg mykje»

Spelemannen og kulturarbeidaren Gunnar Stubseid er også i Bogota - og jublar:

- For meg som tilhøyrer den eldre garde av utøvarar i Setesdal så er det stort å få oppleve at musikk- og dansetradisjonane i Setesdal kjem inn på UNESCOs verdsarvliste. Dette vil bety uendeleg mykje for musikken og dansen både i Setesdal og landet elles, seier Stubseid til Setesdølen.

Søkte for sju år sidan

Heilt sidan 2012 har Setesdal Spelemannslag arbeidd for å få dei stolte kulturtradisjonane frå Setesdal til å bli ein del av verdensarvlista for immateriell kulturarv. Innsatsen er blitt gjort for at folkemusikken, stevkunsten, dansen og slåttespillet ikkje skal gå tapt.

Bjørgulv K. Bjåen

Bjørgulv K. Bjåen er journalist i nyhendeavdelinga i Vårt Land. Han har arbeidd i Vårt Land sidan 1992 og har tidlegare vore deskjournalist, vaktsjef, nyhendeleiar og samfunnsredaktør (nyhenderedaktør) i avisa. Han skriv særleg om asyl-, flyktning- og integreringspolitikk, oppvekst og utanriks – og konsekvensar av vedtak i regjeringa og Stortinget.