No er Sentrum offisielt eit politisk parti

I alt har partiet Sentrum levert inn 7.800 underskrifter til Partiregisteret, melder dei i ei pressemelding.

Partiet måtte samle inn minst 5.000 signaturar før nyttår, for å bli registrert som politisk parti og for å kunne stille lister med kandidatar ved stortingsvalet i 2021.

– Eg er utruleg glad for at det formelle no er på plass. I ei spesiell tid med nedstenging og sosiale avgrensingar, seier Sentrum-leiar Geir Lippestad.

Politisk verkstad for å sluttføre partiprogrammet

Allereie i november i fjor, blei det klart at Sentrum hadde komme over den magiske 5.000-grensa for signaturar. Onsdag kom stadfestinga frå Brønnøysundregistra.

– Ein viktig milepæl, slår Sentrum fast.

I desember fortalde Lippestad at dei ville stille lister i alle fylke i stortingsvalet. Lippestad seier dei driv storstilt politisk verkstad i desse dagar, for å vere klare til mai.

– Den neste milepælen er no å levere det meste spennande partiprogrammet i Noreg! Og starte valkampen, seier Lippestad.

Sentrum-leiaren seier at programkomiteen skal legge fram eit fullverdig partiprogram innan landsmøtet i mai. Programkomiteen baserer seg på berekraftsmåla til FN, ifølgje Lippestad.

Profilerte namn i fleire ledd

Partiet Sentrum blei til i september i fjor, då fleire tidlegare KrF-politikarar starta det som skulle vere eit kristent sentrum/venstre-alternativ i norsk politikk.

Tidlegare Ap-politikar Geir Lippestad blei partileiar, medan tidlegare profilerte KrF-arar i Kristin Walstad og Irene Solli blei nestleiarar. Både Walstad og Solli var sentrale på «raud» side i retningsstriden til KrF i 2018.

I november blei det klart at tidlegare KrF-nestleiar gjennom 13 år, Dagrun Eriksen, også melde overgang til Sentrum.

[ Dagrun Eriksen: «Da det sosiale hjertet til KrF ble tynnet ut, følte jeg meg ferdig med aktiv politikk» ]

Bondevik leiar ungdomsfløy

I tillegg har Sentrum fått med seg fleire sentrale unge KrF-namn i stiftinga av Unge Sentrum. Mest profilert er Simen Bondevik, barnebarnet til tidlegare KrF-leiar og statsminister Kjell Magne Bondevik.

I august i fjor takka Bondevik nei til stortingsplass for KrF, før han melde seg heilt ut av partiet i november. No leiar han ungdomspartiet i den politiske nyvinninga.

– Eg kjenner det krible i magen, dette er utruleg stort å vere med på, uttalte Bondevik i desember.

Blant andre tidlegare KrFU-profilar i Unge Sentrum, finn vi Kristofer Olai Ravn Stavseng (tidlegare landsstyremedlem og Oslo KrFU-leiar), Knut Inge Gjønnes (tidlegare KrF-kandidat og barnebarn av tidlegare KrF-statsråd Kåre Gjønnes) og Magnus Brandt Lågøyr (son av den profilerte KrF-rådgivaren Marit Brandt Lågøyr).

---

Sentrum

• Etablert 29. september.
• Partiet blei offisielt registrert i Partiregisteret, den 6. januar 2021, etter å ha samla inn 7.800 underskrifter. Ein må minimum ha 5.000 underskrifter.
• Partileiar er Geir Lippestad, tidlegare politikar og byråd for Arbeidarpartiet i Oslo. 1. nestleiar er Kristin Walstad, tidlegare rådgjevar for stortingsgruppa til KrF. 2. nestleiar er Irene Solli, tidlegare nestleiar i Agder KrF.
• Viktige felt for partiet er kamp mot utanforskap, klima og miljø, næringspolitikk og internasjonal solidaritet. Partiet er livssynsopent og opptekne av religionsdialog for å hindre polarisering.

---