Strippa for våpen og uniformer står dei oppstilte i grensebyen Gisenyi.
Militskrigaren som passar på dei tilhøyrer opprørsgruppa M23 i Kongo.
Mennene i sivile klede kjem frå Romania. Dei kom til Kongo for å krige. Mot betaling. Onsdag blei dei viste fram.
Leigesoldatane er hyrt inn av Kongos styresmakter, for å kjempe mot M23, som blir støtta av Rwanda.
Minst 288 leigesoldatar blei tatt til fange av M23 då opprørsmilitsen nyleg tok byen Goma i Kongo, melder den ugandiske nettavisa Chimpreports, som dekkjer regionen.
I ei pressemelding frå Romanias utanriksdepartement måndag blir det stadfesta at rumenske leigesoldatar var omringa i Kongo, melder Panorama Nyheter.
5.000 dollar i månaden
Rumenske leigesoldatar i Kongo-krigen er ikkje nytt.
I fjor melde nyhendebyrået APA at to innleigde rumenarar hadde blitt drepne i ei trefning aust i Kongo.
APA viste til rumenske aviser som opplyste at rumenske leigesoldatar fekk 5.000 dollar i månaden for å kjempe for Kongo, mot M23.
Det kom også to nordmenn
Kongo er ingen ny marknad for leigesoldatar.
Den belgiske kolonien Kongo blei sjølvstendig i 1960. Men landet blei ikkje samla. Opprørarar erklærte Katanga som sjølvstendig same år.
På begge sider i borgarkrigen kjempa store avdelingar med leigesoldatar – menn frå Sør-Afrika, Belgia, Storbritannia, Cuba
Mellom dei mest kjende var iren Mike Hoare, som kjempa for Katanga – og skreiv boka The Road to Kalamata.
Ein annan var franske Bob Denard og ein tredje belgiske Jean Schramme.
I 2009 kom to norske leigesoldatar til Kongo for å by fram sine tenester, Tjostolv Moland og Joshua French. Dei blei arresterte og dømde til fengsel. Moland døydde i Kongo i 2013.
Paraderte gjennom gatene
Opprørsgruppa M23 rykkjer no vestover i Kongo.
– Dei vil halde fram inn i Sør-Kivu, for Goma kan ikkje vere målet i seg sjølv, seier Vincent Karega til nyhendebyrået AFP.
Han er Rwandas ambassadør til landa rundt Dei store sjøane i Sentral-Afrika.
M23, som har vore aktiv i Aust-Kongo i fleire år, hevda natt til måndag at dei har tatt kontroll over grensebyen Goma, som ligg heilt aust i Kongo, på grensa til byen Gisenyi i Rwanda.
Det er her dei rumenske leigesoldatane blir paraderte gjennom gatene.
Europearane skal bli viste fram.
Chimpreports skriv at dei så blir sendt til Rwanda for å bli returnerte til heimlandet.
