Laurdag heldt Bore kyrkje ope mellom klokka 17 og 20. Tilbodet er for dei som treng nokon å snakka med eller ein stad å gå til etter skytinga på Jæren, der to personar er døde.
– Det er mange som føler seg berørt, det merker eg i samtalar og på sosiale medier. Det er ei hending som opprører og røskar i den trygge jærske kvardagen.
Det seier sokneprest for Frøyland og Orstad kyrkjelyd, Morgan Fjelde, til Vårt Land. Han har ansvaret for arrangementet i Bore kyrkje, som er kome til i samråd med Klepp kommune.
– Det viktige er å ha eit ope rom med moglegheit for samtale, tenna lys og ta i mot dei som måtte koma.
Ordførar: – Vi er alle sterkt prega
Ein politimann i 20-åra og ein mistenkt mann i 40-åra døydde etter ei skotveksling på Klepp på Jæren natt til laurdag. Ein annan politibetjent er skada etter hendinga.
Skytinga fann stad i 1.30-tida.
– Dette er ei svært trist og tragisk hending. Vi er alle sterkt prega, og ønskjer å uttrykkja vår djupaste medkjensle med alle dei pårørande og dei involverte, seier ordførar i Klepp, Kjetil Maudal (Frp), i pressemeldinga til Klepp kyrkjelyd.
Vest politidistrikt har overteke etterforskinga
Vest politidistrikt er oppnemnt som settepolitidistrikt og har overteke etterforskninga av straffesaka mot den mistenkte mannen i 40-åra som døde etter skotvekslinga med politiet.
Etterforskarar og teknikarar frå Vest politidistrikt har ved 12-tida laurdag begynt å ankomme Stavanger, melder NTB.
Også Spesialenheten er kopla inn, som skal etterforska politiets handlingar då den mistenkte mannen vart skoten og drepen.
