– Ingen som er i reserven må returnere, om dei er i utlandet, men svært mange vil no heim for å kjempe mot Hamas, fortel Avi Nir-Feldklein til Vårt Land.
Han er Israels sendemann til Norge.
– Israel har etablert tre punkt som no blir operert av israelske fly, eit i Peru, eit i Thailand og eit i USA. Mange israelarar som er ferdig med verneplikta, og mange unge vaksne, reiser gjerne til Sør-Amerika, Søraust-Asia og USA på ferie, forklarar ambassadøren.
Mellom israelarar er det populært å reise utanlands om hausten. Særleg mange studentar er på haustferie før studia startar opp att.
[ Vi må snakke om jødehatet i Midtausten ]
Rekordstor mobilisering av soldatar
Israels væpna styrkar – Israels Defence Forces (IDF) – kallar no inn kring 300.000 reservistar, eller reservesoldatar, melder Reuters.
Aldri før i Israels historie har landet mobilisert så store styrkar.
Dei skal nedkjempe den palestinske organisasjonen Hamas, som laurdag gjekk til svært brutale angrep på Israel, angrep som held fram måndag.
– Ingen israelarar som er i Norge har kontakta ambassaden med spørsmål om å få hjelp til å reise heim, men fordi ambassaden i Norge også dekkjer Island, er me blitt kontakta av reservistar som er der og vil heim, snarast mogleg.
Ingen som er i reserven må returnere, om dei er i utlandet, men svært mange vil no heim for å kjempe mot Hamas
— Avi Nir-Feldklein, ambassadør
Legar reiser heim til Israel
Vårt Land har snakka med ein israelarar som er i Norge på ferie. Han avbryt opphaldet og reiser til Israel måndag, men skal ikkje gjere teneste i IDF. Han vender heim for å drive hjelpearbeid.
– Mange israelarar i utlandet kjenner no på eit stort ansvar, dei må heim for å hjelpe. Eg kjenner til legar som bryt opp frå faste jobbar og vender heim, fortel Nir-Feldklein.
[ Støre vil fortsatt ikke kalle Hamas for terrororganisasjon ]
Sonen reiser i krigen
IDF har 170.000 soldatar i ståande styrkar. Menn har nesten tre års verneplikt, kvinner to år, og fleire vervar seg etter endt teneste og blir yrkessoldatar. Etter endt verneplikt held svært mange fram i den militære reservestyrken til dei kjem i 40- eller 50-åra. I dag har Israel kring 465.000 reservistar.
No er to av tre reservesoldatar kalla inn. Mellom dei er son til ambassadøren. Han bur i Israel.
– Han er kalla inn til hæren, fortel Avi Nir-Feldklein til Vårt Land.
Laurdag erklærte statsminister Benjamin Netanyahu krig mot Hamas.
---
Israels forsvar
- Israels forsvar ber namnet IDF – Israels Defence Forces.
- 170.000 soldatar i ståande styrkar, menn har nesten tre års verneplikt, kvinner to år, fleire vervar seg etter endt verneplikt.
- Kring 465.000 gjer teneste i den militære reservestyrken, fram til dei er i 40- eller 50-åra.
- Reservistar er tenestepliktig personell som har sitt primære virke utanfor det israelske forsvaret i fredstid, men som skal kunne tre inn i stillingar ved krise og krig.
---
Demonstrantar trekkjer i uniform
Ambassadøren fortel at no stiller nasjonen opp, sjølv om mange har demonstrert mot Israels regjering sidan januar, også reservistar som nekta å bli kalla inn til øvingar så lenge regjeringa ville gjennomføre den omstridde rettsreforma.
– Men det kjem også medierapportar om israelarar som reiser frå landet fordi dei ikkje vil kjempe mot Hamas?
– Ja, men dei er få.
Organiserer heimreiser frå Europa
Førre fredag reiste ambassadør Avi Nir-Feldklein til New York på ferie, berre for å måtte returnere til Oslo. Han måtte vere på post.
– På hotellet i New York kom eg i kontakt med ein israelsk fallskjermjeger som var på ferie. Han ville berre ein ting: Heim. Men det går få fly til Israel, mange selskap kansellerer rutene.
Avisa Haaretz skriv at stranda reservistar no organiserer flyreiser til Israel i Frankrike, Italia, Kypros, Tyskland, Spania, Austerrike, Tyrkia, Storbritania og på Balkan.
