Laurdag denne veka blir det arrangert regnbogetog i Oslo. Toget kjem etter at den vanlege Pride-paraden vart avlyst etter terroren i Oslo natt til 25. juni.
Statsminister Jonas Gahr Støre har alt sagt til VG at han kjem til å gå i dette toget. No seier KrF at dei vil stilla med ein representant frå partileiinga.
– KrF ønsker å stilla med partileiing. Me jobbar no med logistikken for å sjå kven frå partileiinga som kjem til markeringa i Oslo laurdag, seier pressesjef i KrF Tove Christine Welle Haugland til Vårt Land.
Partileiinga til KrF består av leiar Olaug Bollestad og nestleiar Dag-Inge Ulstein.
– Olaug Bollestad har signalisert i fleire omgangar at ho ønsker å stilla på solidaritetsmarkering. Me ønsker å visa solidaritet med dei ramma, seier Haugland.
Listhaug skal til Midtausten
Arrangementet skal vera eit regnbogetog som skal enda opp i ein solidaritetsmarkering ved Akershus festning. Markeringa blir meir nedtona enn den vanlege Pride-paraden.
Frp-leiar Sylvi Listhaug sa til VG i sommar at ho vil gå i pride, sjølv om ho tidlegare har vore skeptisk til slike paradar.
I intervjuet viste Listhaug til «den forferdelige terroren i Oslo» og sa at ho vil «ved første og beste anledning stille opp i et pride-tog eller på et pride-arrangement».
No skriv presseavdelinga til Frp i ein sms til Vårt Land at Sylvi Listhaug ikkje har høve til å delta på markeringa i helga, då ho skal på reise med utanriks- og forsvarskomiteen på Stortinget.
Ifølgje Stortingets kalender skal komiteen til Israel, Jordan og Palestina i tidsrommet 10. til 15. september.
Vårt Land har spurt presseavdelinga om Listhaug ville ha gått i tog om ho var i Oslo den dagen. Dei har ikkje svara på det spørsmålet trass fleire meldingar.
Pastor Erik Andreassen skal ikkje gå
Pastor og forfattar Erik Andreassen i Oslo misjonskirke Betlehem opna i sommar for at han ville gå i pride-tog. Han la ut eit Facebook-innlegg med støtte til offera etter masseskytinga:
«Jeg tenkte gjennom natten der jeg var på hytta at nå var det kanskje på tide å gå i min første Pride-parade».
I sommar sa han til VG:
«Før har det vært uaktuelt for meg å gå i Pride-tog, men nå har jeg lyst å gjøre det, i solidaritet med alle skeive. Men jeg usikker på om det finnes en fane som passer for meg.»
No skriv han i ein sms til Vårt Land at han ikkje kjem til å gå i toget.
– Eg går ikkje fordi eg ikkje har høve til det. Ut frå det eg hadde sett om arrangementet, ville eg gått om eg hadde hatt høve, skriv han.
Han har ikkje vore tilgjengeleg for telefonintervju.
VID-rektor ville deltatt i Stavanger om han var i landet
Rektor Bård Mæland ved VID vitenskapelige høgskole sa i sommar til Vårt Land at skulen skal jobba «dypere med egne holdninger og historie» til skeive.
Han beklaga at han har vore med i samanhengar som i praksis har «problematisert homofilt samliv og forsinket en teologisk og kirkelig anerkjennelse av skeive og deres kjærlighet».
Bård Mæland skriv i ein sms til Vårt Land at VID hadde stor deltaking på Pride i Stavanger førre laurdag, med mange leiarar, tilsette og studentar.
– Me prioriterte dette arrangementet i år. Sjølv var eg dessverre på Kyrkjenes Verdsråds generalforsamling i Karlsruhe, men hadde elles delteke i Stavanger, skriv Mæland.
Han er busett på Vestlandet og kjem ikkje til å vera i Oslo i helga.
[ Ber muslimsk talsperson ta oppgjer med gamle utsegn om homofili ]
---
Terror og pride
- Natt til laurdag 25. juni vart to personar drepne og fleire titals såra då Zaniar Matapour opna eld mot to pubar i Oslo sentrum, ein av dei den skeive utestaden London Pub.
- Pride-paraden, som skulle gå seinare same dag, vart avlyst.
- Ein av teoriane politiet jobbar etter, er at skytinga var hatkriminalitet retta mot homofile.
- Det gjeldande trusselnivået er fire - høg. Det tyder at PST ser at det er fleire aktørar som har evne og vilje til å gjennomføra terror i Norge.
Kjelde: NTB og PST
---
